"Rusiya müxalifətin sərhəd problemlərini Qarabağla əlaqələndirmək cəhdlərini yersiz sayır" - Moskvadakı mənbə...
Moskva Azərbaycanla Ermənistanın sərhəd problemlərini tezliklə yoluna qoymasına və münasibətlərin normallaşması məsələsində irəliləməsinə çalışır. Ermənistan müxalifətinin sərhədlərin delimitasiyası və demarkasiyasını Qarabağ məsələsi ilə əlaqələndirmək cəhdlərini isə yersiz sayır.
"Azsiyaset" virtualaz.org-a istinadla xəbər verir ki, bu haqda Moskvadakı mənbə “EADaily” saytına bildirib. Azəraycanla Ermənisan arasında postmünaqişə dövrü nizamlanması prosesinin gedişi ilə tanış olan həmin mənbə bildirib: “Soçi görüşünün yekunlarına dair qəbul edilmiş üçtərəfli bəyanat Rusiya tərəfinin postmünaqişə dövrü nizamlanmasının prioritet istiqamətlərinin işlənib hazırlanması məqsədi ilə regionda mövcud olan tendensiyaları diqqətlə izlədiyinə dəlalət edir. Əgər 2020-ci il noyabrın 9-da hər şeydən mühüm olanı münaqişəni təcili dayandırmaq və de-eskalasiyanın əsas yollarını müəyyən etmək idisə, indi münaqişənin məhək daşı sərhəd problemidir, hansı ki, tərəflər bu problemi həll edərək münasibətlərin normallaşması prosesində irəliləyəcəklər”.
Xatırladaq ki, ötən gün Rusiya XİN-in rəsmi nümayəndəsi Mariya Zaxarova Moskvanın Bakı və İrəvandan dövlət sərhədlərinin demarkasiyasına dair komissiyanı tezliklə formalaşdıracaqlarını gözlədiyini deyib. Onun sözlərinə görə, Moskva əldə edilmiş razılaşmaların ardıcıl şəkildə yerinə yetirilməsi üzərində fəal işləyir.
Soçi görüşündə əldə edilmiş razılaşmaya əsasən tərəflər sərhədlərin delimitasiyasına dair birgə komissiyanı ilin sonuna qədər formalaşdırmağı qərara alıblar. Rusiya prezidenti Vladimir Putin isə bu günlərdə bəyan etmişdi ki, Moskva Azərbaycan-Ermənistan sərhədindəki gərginliyin aşağı salınması və sərhədlərin delimitasiyası, daha sonra demarkasiyası prosesinin tezliklə başlaması üçün bütün zəruri dəstəyi göstərməyə hazırdır. Onun sözlərinə görə, sərhədlərin haradan keçdiyini göstərən xəritə ancaq Rusiya ordusunun Baş qərargahında var.
Ermənistan müxalifəti sərhədlərin delimitasiyası və demarkasiyasını Qarabağla əlaqələndirməyə çalışır. Moskvada isə, həmin mənbənin dediyi kimi, bunu yersiz hesab edirlər.
“Yeni üçtərəfli bəyanat 9 noyabr 2020-ci il və 11 yanvar 2021-ci il bəyanatlarını , eləcə də Minsk Qrupu çərçivəsində mövcud olan formatı qüvvədən salmır”, - mənbə belə deyib.
