"Rus ayısı” Qərbin təsvir etdiyi qədər qorxulu deyil..." - Polşalı general

11 dekabr, 2021 01:11

“Vladimir Putin NATO ilə tammiqyaslı qarşıdurmaya dözə bilməz, ona görə də Qərbi müharibə ilə qorxutmaqla açıq-aşkar blef edir”.

"Azsiayset" moderator.az-a istinadla xəbər verir ki, bunu Polşa generalı Roman Polko “TVP Info” telekanalına müsahibəsində bildirib. General izah edib ki, son on il yarım ərzində Rusiya lideri gözlənilməz rus ayısı rolunu oynayır, ən yaxşısı onu əsəbləşdirməməkdir. Və məhz bu taktikaya əməl edən Rusiya prezidenti Qərblə danışıqlarda növbəti bütün qələbələri özünə təmin edir.

“Qərb Vladimir Putinə qarşı sərt şərtlər irəli sürməlidir. Qorxmaq əvəzinə deməlidir ki, Ukraynaya qarşı aqressiv planlarından dərhal əl çəkməlidir... O, Ukrayna ordusunun bərpası üçün addımlar atmalı və açıq şəkildə deməlidir ki, təsir dairələrinin delimitasiyası olmayacaq. Onun büdcəsi Polşanın xərclədiyinin yarısıdır və ona verilən yer və tapşırıqlar daha çoxdur", - deyə polşalı general Roman Polko izah edib. Bununla belə, “TVP İnfo” telekanalına müsahibəsində o, Ukrayna ordusunun 2014-cü ildəkindən tamamilə fərqli vəziyyətdə olduğuna diqqəti çəkərək bu gün onun öz sərhədlərini qoruya bildiyini söyləyib.

ABŞ-ın “Şimal axını-2”-yə qarşı sanksiyalardan əl çəkməsinin Kremlin Ukraynanı işğal etməkdən imtinası bahasına başa gəlib-gəməyəcəyi ilə bağlı suala o, belə cavab verib: “Bu, Putinin qara senarisi olardı. Təbii ki, Putin NATO ilə genişmiqyaslı müharibəyə və qarşıdurmaya dözə bilməz. O buna nə hərbi, nə də iqtisadi cəhətdən tab gətirə bilməz və Şimali Atlantika Alyansından daha zəif kartlara malikdir. Odur ki, fürsətçilik və konformizm hökm sürərsə və Putinə sülh və əmin-amanlıq bahasına daha bir strateji layihə həyata keçirməyə və bununla da can atdığı enerji müharibəsində qalib gəlməyə icazə verilərsə, bu, şübhəsiz ki, yaxşı heç nə vəd etmir”. Onun fikrincə, ABŞ, Almaniya, Fransa və İtaliyanın diplomatik jestlərin dilindən çox konkret hərəkətlərin dilini başa düşən Rusiya prezidentinə təşəbbüs göstərməsinin və şərtlər diktə etməsinin vaxtı çatıb.

Polşalı general əmindir ki, Qərb dövlətləri gələcəkdə Ukraynanın NATO-ya üzv olmasına imkan verəcək “yol xəritəsi”nin işə salınması üçün hər cür səy göstərməlidir. "Putin aydın şəkildə eşitməlidir: "Siz bunu qəbul etmirsiniz? Qarşıdurma istəyirsiniz? Onda bu arzunuza çatacaqsız". Putin ciddi qarşıdurmaya imkan verməz, çünki onu uduzar. “Şimal axını-2”-nin dondurulması Avropadan çox onun üçün qat-qat böyük iqtisadi zərbə olardı”, - deyə hərbçi izah edib.

Üstəlik, Roman Polkonun fikrincə, bu gün Rusiya prezidenti ictimai fikir ayrılığına görə hələ çox güclü olmayan Ukrayna ordusu ilə belə açıq qarşıdurmaya hazır deyil. Cəmiyyət Rusiyanın öz qardaşlarını qətlə yetirməsi, minlərlə meyitin tabutda vətənlərinə qaytarılması ilə barışa bilməyəcək. “Bu, Putinin məğlubiyyəti olardı... amma o, blef edir. Son on il yarımdır ki, o, gözlənilməz ayı rolunu oynayır, onu əsəbləşdirməmək daha yaxşıdır. Və bu yolla o, növbəti döyüşlərdə qalib gəlir”, - deyə hərbçi bildirib.

General həmçinin əmindir ki, əgər Qərb Putinlə Aİ və ya NATO-nun təmsilçisi kimi danışsa, dialoq xeyli səmərəli ola bilər. “Putin ayrı-ayrı ölkələrin liderləri ilə, məsələn, kansler Angela Merkellə danışıqlarda uğur qazanıb. Niyə Qərb bunu NATO və ya Aİ-nin başında duran adamlar vasitəsilə edə bilməsin? Və beləliklə, həmrəylik nümayiş etdirib Rusiyaya açıq şəkildə deməsin: “Bu dəfə bizi indiyə qədər etdiyin kimi ayrı-ayrılıqda oynada bilməyəcəksən”, - deyə general söyləyib.

Polko onu da diqqətə çatdırıb ki, Rusiyaya iqtisadi zərbə müəyyən həddə qətiyyət və ardıcıllıqla müşayiət olunarsa, təsirli olardı, çünki o zaman Rusiya lideri hərbi istiqamətdə ləngiməli olar. “Mən Ukrayna ərazisində Polşa-Britaniya-Ukrayna birgə təlimlərinin təşkilində şəxsən iştirak etmişəm. Bizim təlimlərimiz Putinin təliminə cavab olmalıdır. Putinin əlindən sürüşüb çıxan ölkəyə zərbə endirmək imkanı yoxdur. Biz öz növbəmizdə Ukraynanın ardıcıl destabilizasiyaya məruz qalmasına və yenidən Rusiyanın təsir dairəsinə düşməsinə icazə verə bilmərik”, - deyə general Roman Polko müsahibəsini yekunlaşdırıb.