Əsabil Qasımov Jeleznovodskda 2 milyardlıq otel aldı - Azərbaycanın pulları xaricə daşınır
Rusiyanın Jeleznovodsk şəhərində Qafqaz Mineral Sularının ən iri sağlamlıq mərkəzlərindən biri olan beşulduzlu “İstoçnik Jeleznovodsk” sanatoriya tipli oteli açılıb.
"Azsiyaset" virtualaz.org-a istinadla xəbər verir ki, bu haqda şəhər administrasiyasının mətbuat xidməti bildirir.
Sanatoriya şəhərin mərkəzində, yarımqəzalı vəziyyətdə olan binanın yerində üç il ərzində tikilib başa çatdırılıb. Cəmi 500 yerlikdir və layihəyə 2 milyard rubla yaxın investisiya yatırılıb.
Stavrapol qubernatorunun mətbuat xidmətinin informasiyasında deyilir ki, sanatoriya xarici investisiya hesabına tikilib, investor isə Azərbaycan şirkətidir.
Açılış mərasimində layihənin investoru Əsabil Qasımov (azərbaycanlı biznesmen-oliqarx, keçmiş deputat, - red.) və Azərbaycanın Rusiyadakı səfiri Polad Bülbüloğlu iştirak edib.
Sanatoriyanın müasir tibbi və SPA-avadanlıqları ilə təchiz olunduğu bildirilir. Orada geniş spektrda xroniki xəstəliklər, o cümlədən dayaq-hərəkət sistemi xəstəlikləri, maddələr mübadiləsinin pozulması və s. müalicə olunacaq.
Əsabil Qasımov 2016-ci ildə Yessentukidə 1.5 milyard rubl investisiya hesabına 400 yerlik “İstoçnik” sanatoriyasını açmışdı.
