İran idmançıları Xankəndidə turnirə qatılır - Azərbaycana qarşı daha bir təxribat

Bu gün saat 19:00-da Xankəndidə müharibədə ölən erməni əsgələrin xatirəsinə həsr olunan idman turniri keçiriləcək. Turnirdə İran idmançıları da iştirak edəcəklər.

Rəsmi Tehran bilir ki, Xankəndi Azərbaycan torpağıdır və orada separatçıların təşkil etdiyi istənilən tədbir qanunsuzdur. İran idmançılarının bu tədbirdəki iştirakı Azərbaycana qarşı açıq təxribatdır və bu, rəsmi Tehranın ölkəmizə qarşı səmimi olmadığının göstəricisidir.

Bu necə olur ki, İran Azərbaycanın ərazi bütövlüyünü dəstəklədiyini bəyan edir, ardınca da öz idmançılarını Xankəndinə göndərir!?

Qarabağda öz torpaqları uğrunda döyüşüb dünyasını dəyişən azərbaycanlıların şəhid olduqlarını dəfələrlə bəyan edən İran, görəsən müharibədə ölən erməni əsgərləri barədə nə düşünür? İran idmançıları Xankəndinə gedib onların məzarı başında baş əyib əklil qoyacaq? Başqa nə? Onlara da şəhid deyəcək? Belə bir riyakar və qərəzli münasibətin izahı olmalıdır.

Artıq saatlar qalıb. İran rəhbərliyi idmançıların Xankəndidə keçiriləcək turnirdə iştirakının qarşısını almalıdır.

Əgər bu tədbir Ermənistanda keçirilsəydi, bu mövzuya toxunmazdıq. Söhbət Azərbaycan torpaqlarında separatçıların təşkil etdiyi tədbirdə Azərbaycanın ərazi bütövlüyünü tanıyan İranın iştirakından gedir.

İran sonuncu dəfə Xankəndinə icazəsiz yük daşıyan zaman Azərbaycanla gərgin münasibətlər platformasına daxil oldu. Ölkəmiz haqlı olaraq bu məsələdə İranın qanunsuz addımlarını, ermənilərə dəstək verməklə törətdiyi təxribatları ən sərt şəkildə qınadı.

Noyabrın 28-də Aşqabadda Prezident İlham Əliyev və İbrahim rəisi arasında baş tutan görüşdən sonra iki ölkə arasında isti münasibəttərin qurulması, davam etdirilməsi qərara alınıb.

O zaman İran niyə səmimi ola bilmir?

Bir neçə ay öncə İran Xankəndinə qanunsuz yük daşımaları ilə bağlı məsuliyyəti özəl şirkətlərin üzərinə atmışdı. Ancaq bu məntiqsiz yanaşma tezliklə alt-üstü oldu, İran konkret faktlarla ifşa edildi. Bu dəfə nə olacaq? Məgər İran idmançıları Xankəndidə keçirilən döyüşə İran bayrağına sarılaraq çıxmayacaqlar?

Müəllif: Samir Feyruzov