Türkiyənin hansı hədəfləri var? - Ərdoğan açıqladı
Türkiyə prezidenti Rəcəb Tayyib Ərdoğan hökumətin iqtisadiyyatda hazırladığı alətlərin ölkəni “mənfi dairədən” xilas etdiyini deyib.
Onun sözlərinə görə, Ankaranın məqsədi dünyanın ilk 10 iqtisadiyyatına daxil olmaqdır.
Bu barədə TASS xəbər verir.
"İqtisadiyyatda keçdiyimiz yol və inkişaf etdirdiyimiz alətlərin köməyi ilə ölkəmizi keçmişdə düşdüyü mənfi dairədən xilas etmişik. Yolumuz - məşğulluq, istehsal, ixracda artıma nail olmaqdır. Məqsədimiz isə dünyanın ən yaxşı 10 iqtisadiyyatına daxil olmaqdır", - deyə Türkiyə lideri çərşənbə axşamı deyib.
Türkiyə maliyyə sistemi son bir ildə lirənin ucuzlaşması səbəbindən çətin günlər yaşayır. Türk lirəsi Mərkəzi Bankın uçot dərəcəsini ardıcıl olaraq bir neçə dəfə endirməsindən sonra kəskin ucuzlaşıb: dollar hələ yanvarda 7,4 lirə idisə, dekabrın 20-də rekord həddə - 18,4 lirəyə çatıb. Ərdoğanın məzənnənin dəyişkənliyinə qarşı yeni tədbirlərlə bağlı açıqlamalarından sonra türk valyutasının ucuzlaşması əhəmiyyətli artımla əvəzləndi, nəticədə lirə son həftələrin itkilərini kompensasiya edib: çərşənbə axşamı dollar təxminən 11,8 lirəyə bərabər idi.
