Tokayev günahkarların adlarını açıqladı - Qiymətlərlə bağlı radikal qərarlar verildi
Yeni ilin ilk günlərində Qazaxıstanın Manqistau vilayətinin Janaozen və Aktau şəhərlərinin sakinlərinin başlatdığı etiraz aksiyaları demək olar ki, bütün ölkəni bürüməkdədir. Artıq paytaxt Astana və Alma-Ata şəhərlərində də kütləvi aksiyalar keçirilib, həbs olunanlar və xəsarət alanlar var. Xarici media orqanları xəbər verirlər ki, görülən tədbirlərə baxmayaraq, etirazlar səngimək bilmir.
Bu arada ölkədə yaranmış vəziyyətlə bağlı hökumətin geniş iclasını keçirən Prezident Kasım-Jomart Tokayev baş verən gərginliklə bağlı məsuliyyəti hökumətin üzərinə atıb. Artıq xəbər verildiyi kimi, hökumət tam tərkibdə istefaya göndərilib və Baş nazir səlahiyyətləri Əsgər Mamindən alınaraq Əlixan Smailova verilib.
Qazaxıstan mətbuatı xəbər verir ki, Tokayev əsas günahın ölkənin Energetika Nazirliyində, eləcə də “Kazmunayqaz” və “Kazakqaz” şirkətlərində olduğunu bəyan edib.
Prezident deyib ki, sözügedən nazirlik sıxılmış təbii qazın qiymətinin elektron ticarət vasitəsilə tənzimlənməsi prosesində kobud səhvlərə yol verib.
Adı çəkilən şirkətlər isə yaranmış vəziyyətdən öz mənfəəti üçün istifadə edib. Məlumat verildiyi kimi, etirazların başladığı Janaozen rayonundakı təbii qaz emalı zavodunun direktoru da artıq həbs olunub. Tokayev həmçinin, Dövlət katibini və Dövlət Təhlükəsizlik Komitəsi sədrini də vəzifəsindən azad edib.
Bunlarla yanaşı, Tokayev təkcə sıxılmış qaz deyil, bir çox məhsullar və kommunal xidmətlərlə də bağlı rəsmi göstərişlər verib.
Belə ki, Prezident hökumətə sosial əhəmiyyət daşıyan məhsulların qiymətini tənzimləməklə bağlı tapşırıq verib. Həmçinin, 6 ay müddətinə kommunal xidmətlərin qiymətinin artırılmasına qadağa qoyub.
Eləcə də, aztəminatlı ailələrin kirayə haqlarına görə subsidiyalar ayrılması və onların vəziyyətinin yaxşılaşdırılması məqsədilə xüsusi fond yaradılmasını tapşırıb.
