Rusiya desantçıları Alma-Ata aeroportunu nəzarətə götürdü - Rus qoşunlarına general Serdyukov başçılıq edir
12.08
Qazaxıstana yeridilən və əsasən Rusiya qüvvələrindən ibarət olan KTMT kontingenti Alma-Ata aeroportunu nəzarətə götürüb. Bu haqda Rusiya Müdafiə Nazirliyinin rəsmi nümayəndəsi, general-mayor İqor Konaşenkov bildirib.
“Hazırda Qazaxıstanın hüquq-mühafizə orqanları ilə birlikdə Alma-Ata aeroportu tam nəzarətə götürülüb. Sülhməramlı kontingentin qüvvələri şəhərdəki Rusiya konsulluğunun və digər mühüm obyektlərin də təhlükəsizliyini təmin edir. KTMT sülhməramlıları Qazaxıstan hüquq-mühafizə orqanlarının əməkdaşlarına qanunçuluğun təmin edilməsində və qayda-qanunun yaradılmasında dəstək verir”,-açıqlamada deyilir.
Konaşenkov qeyd edib ki, Rusiya Müdafiə Nazirliyinin yaratdığı, 70-dən çox İl-76 və An-124 hərbi-nəqliyyat təyyarələrindən ibarət aviaqruplaşma sutka ərzində dayanmadan KTMT kontingentinə daxil olan Rusiya qüvvələrinin Qazaxıstana daşınmasını həyata keçirir. Rusiya qüvvələrinin tərkibinə Hava Desant Qoşunlarının 45-ci əlahiddə briqadasının, 98-ci hava-desant diviziyasının və 31-ci əlahiddə briqadasının bölmələri daxildir.
Qazaxıstana yeridilən KTMT qüvvələrinə Rusiyanın hava-desant qoşunlarının komandanı, general-polkovnik Andrey Serdyukov rəhbər təyin edilib.
11:47
Qazaxıstanın Almatı şəhərində “Mir-24” teleradio şirkətinin filialının binası yanır.
Bu barədə yerli media məlumat yayıb. Hadisənin təfərrüatları hələlik məlum deyil. (TASS)
***
10:58
Qazaxıstanın Alma-Ata şəhərindən həyacanlı xəbərlər daxil olmaqda davam edir. Son məlumatlara görə ölkə üzrə internet yenidən kəsilib, Alma-Ata küçələrində intensiv atəş səsləri və partlayışlar eşidilir. Qazaxıstan hakimiyyəti baş verənləri “terrorçu elementlərə qarşı xüsusi əməliyyat” kimi təqdim edir, lakin dinc nümayişçilərə qarşı atəş açılmasını əks etdirən görüntülər də var.
Xəbərlərə görə Qazaxıstan Milli Təhlükəsizlik Komitəsinin Sərhəd Akademiyasının binası ətrafında şiddətli atışmalar olub. Orada akademiyanın rəisinin öldürüldüyü bildirilir. Məlumata əsasən akademiya rəisi binaya hücum edən silahlılarla atışmaya girən kursantlara başçılıq edirdi.
Bu arada əsasən Rusiya ordusunun desantçılarından ibarət olmaqla KTMT sülhməramlı qüvvələrinin Qazaxıstana yeridilməsi davam edir. Elə nümayişçilərə atəş açanların da əsasən rusiyalı muzdlular olduğu haqda xəbərlər var. Qazaxıstan prezidentinin administrasiya rəhbərinin müavini Dauren Abayev isə bildirib ki, KTMT qüvvələri “mühafizə funksiyalarını” yerinə yetirəcəklər və bilavasitə “terrorçu elementlərə qarşı əməliyyatlarda” iştirak etmirlər.
Bildirilir ki, Alma-Atanın silahlılardan təmizlənməsi əməliyyatını “Arıstan”, “Arlan”, “Berkut” xüsusi təyinatlı dəstələri və Müdafiə Nazirliyinin bölmələri həyata keçirir.
Qazaxıstan Daxili İşlər Nazirliyinin yaydığı son məlumata görə, iğtişaşlarda ölən hüquq-mühafizə orqanları əməkdaşlarının sayı 18-ə çatıb, yaralananların sayı 750-ni keçir. Habelə onlarla silahlının öldürüldüyü bildirilir, lakin öldürülənlərin sayının daha çox olduğu haqda xəbərlər var.
