Britaniyanın XİN rəhbəri Putini hədələdi - "Kreml tarixdən dərs çıxarmayıb"
“Qərb “soyuq müharibə”dən bu yana daha cürətli olan diktaturalara qarşı birlikdə mücadilə edəcək”.
Xarici agentliklər xəbər verir ki, bu cümlə Böyük Britaniyanın xarici işlər naziri Liz Trassa məxsusdur.
Onun sözlərinə görə, Qərb koordinasiyalı şəkildə qlobal təhdidlərə reaksiya göstərməli, Hind-Sakit okean bölgəsindəki demokratik rejimlərlə əməkdaşlığı dərinləşdirməli və “qlobal təcavüzkarlara” qarşı müqavimətini artırmalıdır.
Avstraliyanın Sidney şəhərinini Loui institunda danışan britaniyalı diplomat “rəqib ölkələrin diktatura sistemini bir xidmət olaraq bütün dünyaya yaymaq istədiklərini” iddia edib. “Məhz buna görə Belarus, Şimali Koreya və Myanmada hökm sürən rejimlər Moskva və Pekinin timsalında müttəfiq əldə ediblər”,- deyə o, bildirib.
Liz Trass Rusiya prezidenti Vladimir Putini “strateji səhvə yol vermədən Ukraynadan çəkilməyə çağırıb”. “Kreml tarixdən dərs çıxarmayıb və hər hansı müdaxilə dəhşətli insan faciəsinə yol aça bilər. Biz bunu sovet-əfqan müharibəsində və Çeçenistan münaqişəsində gördük”,-deyə britaniyalı nazir qeyd edib.
