Ermənistanın yeni prezidenti necə seçiləcək? - DETALLAR
Məlum olduğu kimi, bir qədər əvvəl Ermənistan prezidenti Armen Sarkisyan istefa verib. O istefasını daxili və xarici siyasətə təsir alətlərinin olmaması ilə əlaqələndirib. Sarkisyan açıqlamasında bildirib ki, Ermənistanda paradoksal vəziyyət yaranıb, prezident faktiki olaraq heç bir real alətə malik olmadan dövlətçiliyin təminatçısı olmağa məcburdur.
"Azsiyaset" modern.az-a istinadla xəbər verir ki, Ermənistan Konstitusiyasının 142-ci maddəsinə əsasən, ölkənin prezidenti istefa verikdə bu barədə ərizəni parlamentə təqdim edir. İstefa qanunla müəyyən edilmiş qaydada dərc edildiyi andan qəbul edilmiş hesab olunur. Konstitusiyanın 144-cü maddəsinə görə, yeni prezident seçilənə qədər Ermənistanın dövlət başçısının səlahiyyətlərini parlamentin spikeri icra edəcək.
Hazırda Ermənistan parlamentinin spikeri postunu Paşinyanın partiyasından olan Alen Simonyan tutur. Yeni konstitusiyaya görə, Ermənistan prezidenti postu boş qaldıqda növbədənkənar seçkilər keçirilir. Seçkilər istefanın rəsmi təsdiq olunmasından 25 gündən sonra və 35 gündən gec olmayaraq keçirilməlidir.
Məlumat üçün bildirək ki, Ermənistan prezidenti parlament tərəfindən seçilir. Namizədlər deputatların ümumi sayının ən azı dörddə biri tərəfindən irəli sürülür. Deputatların ümumi səslərinin azı dörddə üçünün səsini toplayan namizəd Ermənistan prezidenti seçilmiş sayılır. Birinci turda prezident seçilmədikdə, bu turda iştirak etmiş bütün namizədlər ikinci tura keçir. İkinci turda deputatların ümumi səslərinin azı beşdə üçünün (65 deputat) səsini toplayan namizəd prezidenti seçilir. Bu turda da prezident müəyyən olunmasa, ən çox səs toplamış iki namizəd üçüncü turda yarışır və bu raundda səslərin ən çoxunu qazanan şəxs prezident seçilir. 40 yaşına çatmış, son 6 ildə Ermənistan vətəndaşı olan və ölkədə daimi yaşayan, səsvermə hüququna malik olan və erməni dilini bilən şəxs Ermənistan prezidenti ola bilər.
Prezident 7 il müddətinə seçilir. Eyni şəxs bu vəzifəyə yalnız bir dəfə seçilmək hüququna malikdir. Ermənistanda dövlət başçısı başqa vəzifə tuta, sahibkarlıq fəaliyyəti, maaşlı işlə məşğul ola və səlahiyyət müddəti ərzində heç bir partiyanın üzvü ola bilməz.
Xatırladaq ki, Sarkisyan 1996-1997-ci illərdə Ermənistanın baş naziri olub. 2018-ci ildə Daşnaksütun və Ermənistan Respublikaçı Partiyası tərəfindən namizədliyi irəli sürülərək rəqibsiz seçkidə prezident postuna seçilib.
