"Rusiyanın "İsgəndər"ləri Ukrayna ilə yanaşı Polşanı da hədələyir..." - Polşalı general
Dünyada “İsgəndər” və “Patriot” raket sistemləri arasında heç vaxt birbaşa qarşıdurma olmayıb. Bununla belə, məlumdur ki, Rusiya sistemləri NATO raketlərinə qarşı davamlı olmaq üçün hazırlanıb.
Bunu polşalı general Valdemar Skşipçak “Fakt” portalına müsahibəsində bildirib. O, “İsgəndər”lərin Polşa sərhədi yaxınlığında yerləşdirilməsinin Polşa ordusu üçün problemlər yarada biləcəyini izah edib, çünki Varşavanın bəlkə də, sadəcə olaraq, cavab verəcək heç nəyi olmayacaq.
Vladimir Putin ən güclü kartını oynadı. O, Polşa sərhədi istiqamətinə ölümcül silahlar - “İsgəndər-M” raket sistemlərini göndərdi. Münaqişə halında Varşava asanlıqla bu raketlərin əhatə dairəsində ola bilər. “Fakt” xəbər verir ki, Polşa ordusunun onlardan müdafiə oluna biləcəyi məlum deyil, ona görə də problemlər yarana bilər.
“Bizim onları vura biləcək sistemlərimiz yoxdur. “Patriot”larımız olsaydı, bilmirəm, bacarardıq, ya yox”, - deyə Polşa generalı Valdemar Skşipçak portala deyib.
Hərbçinin fikrincə, Ukrayna ilə münaqişə baş verərsə, raket qüvvələrinə gəldikdə, əhəmiyyətli üstünlük Rusiyanın tərəfindədir. “İsgəndər” buraxılış sistemləri cəbhə xətti arxasında 50 km dərinlikdə yerləşdirilə və müasir “S-400” zenit sistemləri ilə qoruna bilər.
“İsgəndər”lərə qarşı nə etmək olar - yalnız mövqelər tapmaq və onları raketlərlə məhv etmək, ukraynalıların isə belə imkanı yoxdur. Bu raketlər uçuş məsafəsindən kənarda yerləşir və Rusiya ordusunun hava hücumundan yaxşı müdafiə altındadır”, - deyə o izah edib.
Söhbət əsnasında Skşipçak qeyd edib ki, Polşa da oxşar vəziyyətə düşüb. Halbuki o, Kalininqrad yaxınlığında yerləşdirilmiş reaktiv yaylım atəşi sistemlərini artilleriya ilə məhv etməyə cəhd edə bilsə də, indiyədək dünyada heç kim dəqiq hansı sistemlərin Rusiya raketlərinin qarşısını ala biləcəyini sınaqdan keçirməyib. “Əslində “İsgəndər”lə “Patriot” arasında qarşıdurma hələ dünyada baş verməyib. Ancaq məlumdur ki, Rusiya sistemləri NATO raketlərinə davamlı olacaq şəkildə qurulub", - deyə general bildirib.
