Ermənistan bu problemi ona görə uzadır ki, Azərbaycan əhalisi Qarabağa gec qayıtsın...
“Hesab etmirəm ki, Ermənistanın Türkiyəyə yaxınlaşması hansısa böyük bir dəyişikliyə səbəb olsun. Sadəcə olaraq bu görüşlər Türkiyə və Ermənistan arasında olmayıb, sıfır dərəcəsində idi. İndi sıfırdan hardasa 1-ə keçib”.
"Azsiyaset" xəbər verir ki, bunu moderator.az-a açıqlamasında hərbi-ekspert Azad İsazadə deyib. Ekspertin sözlərinə görə əhalinin Qarabağa qayıdışı Ermənistanda böyük səs-küyə səbəb olacaq və ona görə Ermənistan vaxtı uzatmağa çalışır:
“Azərbaycanla isə delimitasiya məsələsində danışıqlar gedir. Sadəcə Ermənistan maksimum dərəcədə çalışır ki, vaxt udsun. Onlar hesab edirlər ki, vaxtı uzatmaq onların xeyrinə ola bilər. Amma halbuki prosesin geri dönməyə şansı yoxdur. Çünki yaxın 10-15 il ərzində bu proses davam edəcək və Ermənistan artıq çöküb. Ermənistan bu problemi ən çox ona görə uzadır ki, Azərbaycan əhalisi Qarabağa maksimum gec qayıtsın. Çünki azərbaycanlılar Qarabağda və sərhədboyu zonalarda yerləşsə, Ermənistandan camaatın köçməsi daha da qlobal xarakter daşıyacaq. Mən belə başa düşürəm ki, biz sadəcə səbrlə işimizi davam etdirməliyik. Delimitasiya və demarkasiya və o cümlədən işğalda qalan Qarabağ torpaqlarının azad olunması hələ bir az vaxt aparacaq. Ümidlə gözləyirəm ki, 9 noyabrda imzalanan bəyannaməyə görə dörd il yarımdan sonra biz sülhməramlıların ordan getməsinə nail olacağıq. Bu prosesi biz aradan qaldıra bilsək, bütün qalan proseslər də daha tez həyata keçəcək”.
Qeyd edək ki, Ermənistanın baş naziri Nikol Paşinyanın mart ayında Türkiyəyə səfərə gedəcəyi açıqlanıb. Paşinyan Antalya Diplomatiya Forumunda iştirak edəcək.
