Avstriyadan ittiham - ADP sədri günahı kimlərin üstünə atır?
Xəbər verdiyimiz kimi, Avstriya hakimiyyəti 6 ildir bu ölkədən siyasi sığınacaq almağa çalışan Qasımovlar ailəsini Azərbaycana deportasiya etmək qərarına gəlib.
Məlumata görə, Siyafər və Şəmsiyyə Qasımovlar 2016-cı ildə iki övladı ilə birlikdə Azərbaycanı tərk ediblər. Avstriyaya gələn Siyafər Qasımov müxalif Azərbaycan Demokrat Partiyasının fəalı olduğunu bəyan edib və bildirib ki, həbs olunacağından qorxaraq ölkədən qaçıb.
Avstriya Federal İnzibati Məhkəməsi üçüncü və sonuncu dəfə Qasımovların siyasi sığınacaq tələbini rədd edərək, onların Azərbaycana deportasiyasına qərar verib.
“Azərbaycan Demokrat Partiyası əsl müxalifət partiyası deyil, hakimiyyətə işləyir və onun üzvləri repressiyalardan qorxmamalıdır. Nə həyat yoldaşları, nə də onların uşaqları təhlükə altında deyil”, – deyə “Kurier” nəşri Federal İnzibati Məhkəmənin qərarından sitat gətirib.
Avstriya məhkəməsinin qərarı barədə modern.az-a danışan Azərbaycan Demokrat Partiyasının sədri Sərdar Cəlaloğlu deport edilən şəxslərin onun tərəfdarları olmadığını iddia edib:
“Şəmsiyyə xanım tanınmış jurnalist idi. Burada olanda Şəmsiyyə xanımın bizə münasibəti fərqli olub. Avstriya gediblər. Orada özlərini nəyə görə bizim partiya ilə əlaqələndiriblər, bundan xəbərimiz yoxdur. Amma xarici ölkələrə mühacirət edənlərin kimliyini müəyyən etmək Azərbaycanda olan qeyri-hökumət təşkilatlarına, siyasi partiyalara müraciət edib, həmin adamların kimliyini öyrənirlər. Avstriya bu adamlarla bağlı bizə müraciət etməyib”.
Partiya sədri məlum hadisəyə görə digər müxalifət partiyalarını və QHT-ləri ittiham edib. Onun sözlərinə görə, ADP-yə rəqib partiyaların nümayəndələri belə yanlış informasiyanın yayılmasına səbəb olub.
“Çox güman ki, onlar QHT və siyasi partiyaların nümayəndələrindən bununla bağlı məlumat alıblar. Bizə rəqib olan, bu gün Azərbaycanda bizimlə əks mövqedə dayanan, özünü müxalifət adlandıran qüvvələrin nümayəndələri çalışırlar ki, haqqımızda yanlış rəy formalaşdırsınlar. Əvvəla, kimin iqtidar, kimin müxalifət olduğunu Avstriya məhkəməsi haradan bilir. Avstriya özünü nə hesab edir, özü bilər. Ancaq adları çəkilən Siyafər və Şəmsiyyə Qasımovlar bizim partiyaya aidiyyatı olmayan şəxslərdir”, - deyə partiya sədri ona ünvanlanan ittihamlardan yayınıb və günahı müxalifətin üstünə yıxıb.
