"Paşinyan əvvəlki kimi deyil, Türkiyənin vacib olduğunu bilir" - Sabiq səfir
Türkiyə və Ermənistan arasında əlaqələrin normallaşması istiqamətində bir sıra addımlar atılır. Belə ki, 2021-ci ilin dekabr ayında Türkiyə və Ermənistan birbaşa danışıqlar üçün xüsusi nümayəndələr təyin ediblər. Türkiyənin ABŞ-dakı keçmiş səfiri Serdar Kılıç və Ermənistanın vitse-spikeri Ruben Rubinyan xüsusi nümayəndə qismində danışıqlara cəlb olunublar. Onların arasında ilk görüş yanvarın 14-dә Rusiyanın paytaxtı Moskvada keçirilib.
Xüsusi nümayəndələrin növbəti görüşü fevralın 24-dә Avstriyanın paytaxtı Vyanada baş tutacaq.
Hazırda danışıqlara təsir edəcək əsas mövzu 1915-ci il hadisələri ola bilərmi?
Türkiyənin Fransadakı keçmiş səfiri, sabiq diplomat Uluç Özülker Türkiyə və Ermənistan arasında müzakirə olunacaq mövzular barədə açıqlama verib.
Eks-səfirin sözlərinə görə, proseslər göstərir ki, Ermənistan Türkiyə ilə münasibətləri normallaşdırmaq üçün seçilən mövzuları gözdən keçirir:
“Ermənistanın Türkiyə, Gürcüstan və Azərbaycana qarşı torpaq iddiaları var. Daha sonra saxta soyqırımı iddiaları da mövcuddur. Bu iddialar qarşısında hansısa mühüm qərarın qəbul edilməsi düzgün olmazdı. İndi iki ölkə arasında danışıqların ilkin şərt olmadan aparılmasını baş nazir Nikol Paşinyan qəbul edib. Bu da ölkə konstitusiyasındakı iddiaların masaya daxil edilməməsi deməkdir. Normal şərtlər daxilində Türkiyə bu məsələdə Azərbaycanla birlikdə hərəkət edəcək. Həmçinin Türkiyənin Azərbaycanla bağlı təklifi vardı. Bu “3+3” layihəsidir. Əslində bu məsələdə Rusiyanın da mövqeyini diqqətlə izləmək lazımdır. Çünki nəticə etibarı ilə Cənubi Qafqazda Rusiyanın müsbət mövqe sərgiləməsi lazımdır. Burada dördüncü faktor Ermənistanın mövqeyidir. Artıq bu layihələrə müsbət cavab verməlidir. Burada ruslar hər zaman nəzarəti əllərində tutmaq kimi düşüncədədirlər".
Sabiq diplomatın fikrincə, Ermənistanın daxilində vəziyyət sabit deyil. Separatçı qüvvələr mütəmadi olaraq, atəşkəsi pozaraq, təxribatlara əl atırlar.
"Nikol Paşinyan xalqın dəstəyi ilə seçilib, amma indi o əvvəlki Paşinyan deyil. Siyasi yönümlü olaraq Qərbə açılmaq niyyətində idi, nəticə etibarı ilə bunun mümkün olmadığını öz gözləri ilə gördü. Rusiyaya bir növ tabe olmaq niyyətində qaldı. Ermənistanda hamiyyətin hələ də Rusiyanın əlində olduğunu aydın şəkildə görürük. Paşinyan üçün əgər Qərblə əlaqə gündəm mövzusu olacaqsa, bunun Türkiyə üzərindən edilməsindən başqa yol yoxdur. Ona görə də Paşinyan Türkiyə ilə əlaqələri daha yumşaq formada davam etdirməyin vacibliyini bilir. Bu yaxınlaşmadan Ermənistan qədər Türkiyə də qazanacaq. Eyni zamanda Azərbaycan üçün də sanki bir rahatlıq olacaq. İki ölkə arasında əlaqələrin normallaşmasına müsbət baxıram. Belə görüşlərin olması vacibdir. Təmasların yaxın vaxtlarda dayanacağını gözləmirik. Mən şəxsən bu proseslərin addım-addım davam edəcəyini düşünürəm. Siyasi proses əsas Türkiyə, Azərbaycan və Qafqaz üçün xeyirli bitməlidir. Bundan faydalı şəkildə istifadə etməliyik”, - deyə türkiyəli keçmiş səfir vurğulayıb(modern.az).
