Əsəd də qondarma "respublikaları" tanıyacağını bəyan elədi - Növbətə hansı dövlətlər var?

Suriya Prezidenti Bəşər Əsəd bildirib ki, rəsmi Dəməşq “Luqansk” və “Donetsk xalq respublikalarını” tanımağa hazırdır.

Bunu Rusiya Dövlət Dumasının Suriya parlamenti ilə əlaqə qrupunun koordinatoru Dmitri Sablin bildirib.

“Mən əminəm ki, Rusiyadan sonra “DXR” və “LXR” müttəfiqlər və dostlar tərəfindən tanınacaq. Mən Suriya prezidenti Bəşər Əsədlə Donbasdakı vəziyyət barədə danışmışam. O, Suriyanın da onları tanımağa hazır olacağını bildirib. Cənubi Osetiya və Abxaziyanı tanıdığımız kimi”, - deyə  Sablin vurğulayıb.

Qeyd edək ki, bu gün Rusiya Prezidenti Vladimir Putin Ukrayna ərzisində yaradılan qondarma “Donetsk Xalq Respublikası” və “Luqansk Xalq Respublikası”nın “müstəqilliyini” tanıdığını açıqlayıb.

Jurnalist, siyasi şərhçi Samir Feyruzov özünün "Facebook" səhifəsində qeyd edib:

"Rusiyadan sonra Donetks və Luqanskın müstəqilliyini bu dövlətlər tanıyacaq: Suriya, Venesuela, Nikaraqua, Nautu, Vanuatu... Bu dövlətlər dünyada Cənubi Osetiya və Abxaziyanın da müstəqilliklərini tanıyan yeganə dövlətlərdir".