"Rusiya ilə bundan artıq nə imzalamalıyıq?" - Fazil Mustafa

“Moskva Bəyannaməsi Şuşa Bəyannaməsindən sonra Azərbaycanın ən uğurlu diplomatik həmlələrindən biri idi. Türkiyə ilə imzalanan Şuşa Bəyannaməsi fonunda digər qonşu ölkələrlə də normal münasibətlərin uzunmüddətli tənzimlənməsinə xidmət edən bir sənəddir”.

Bunu Milli Məclisin deputatı, Azərbaycan – Rusiya parlamentlərarası işçi qrupunun üzvü Fazil Mustafa Azərbaycan və Rusiya liderlərinin ötən gün imzaladığı Moskva Bəyannaməsini şərh edərkən bildirib.

Deputatın sözlərinə görə, Rusiya ilə münasibətlərdə də Azərbaycan bərabərhüquqlu sənədə imza ata bilib: “Sənədin elə birinci maddəsinə baxmaq kifayətdir ki, Moskva bəyannaməsi ilə bağlı bütün spekulyasiyalara son qoyulsun. Bəyannamədə qeyd olunur ki, hər iki ölkə müttəfiqlik fəaliyyətini bir-birinin müstəqilliyinə, dövlət suverenliyinə, ərazi bütövlüyünə, sərhədlərin toxunulmazlığına qarşılıqlı hörmət, bir-birinin daxili işlərinə qarışmamaq, qarşılıqlı fayda, güc tətbiq etməmək və güclə hədələməmək prinsipləri üzərində qurulmasına dair öhdəlik götürürlər. Rusiya ilə bundan artıq nə imzalamalıyıq?”.

Fazil Mustafa deyib ki, sənəddə Azərbaycanın marağına zidd bircə məqam belə yoxdur: “Hətta, Azərbaycanın gələcəkdə istifadə edə biləcəyi bir maddə (18-ci maddə -red.) var. Bu, beynəlxalq terrorçuluq, ekstremizm, separatçılıq, transmilli mütəşəkkil cinayətkarlıq və digər bu tipli təhdidlərin qarşısının alınması üçün səylərin birləşdirilməsidir. Bu nə deməkdir? Qarabağda baş verə biləcək hər hansı separatçı hərəkətlərə qarşı Azərbaycan addım atarkən Rusiya ilə müqavilənin məhz bu maddəsinə istinad edəcək. Digər tərəfdən də bəyannamədə ümumi müddəalar – humanitar, iqtisadi, ticarət, mədəni və başqa sahələrdə olan münasibətlər baxımından bir standart, uyğunlaşma, uzlaşma var. Rusiya böyük dövlət kimi Azərbaycanı bərabərhüquqlu bir dövlət statusunda müttəfiqlik formatında münasibət qurursa, biz ondan niyə imtina etməliyik?”.

İşçi qrupunun üzvü bildirib ki, Azərbaycan qonşu dövlətlərlə normal münasibətləri gücləndirməli və hər hansı bir təhlükəni yaxın məsafədən baş verməsi riskini azaltmalıdır: “Baş verənlər Azərbaycanın milli maraqlarına cavab verən addımlardır. Moskva Bəyannaməsinin imzalanması tarixin bu dövründə Azərbaycanın ən faydalı addımlarından, öz marağını təmin edən addımlardan biridir”.

Millət vəkili vurğulayıb ki, Azərbaycanla Rusiya arasında müttəfiqlik Ermənistana böyük zərbədir: “Artıq Ermənistan müttəfiqlik əlaqələri, üçüncü tərəfin mübahisələrə cəlb edilməsi kimi məsələlərdən sui-istifadə edə bilməyəcək. 44 günlük Vətən Müharibəsi zamanı gedən proseslər göstərdi ki, Rusiya öz milli marağından çıxış edən bir dövlətdir və Azərbaycanla da normal münasibət qurmağa birbaşa maraq göstərən ölkədir. Ona görə də hər hansı bir şəkildə Ermənistanın Rusiyaya daha yaxın müttəfiq olması məsələsi bir az fiksiyadır. Çünki kollektiv içində Ermənistanın boyu çox balaca görünür, onun müttəfiqliyinin dəyəri də yoxdur. Azərbaycanın müttəfiqliyi isə bərabərhüquqlu müttəfiqlikdir. Bu, artıq iki bir-birinə hörmət edən dövlətin prosesə, problemlə, gələcəyə baxışını özündə ehtiva edir. Yenə də söyləyirəm - 43 maddəlik bəyanatda Azərbaycanın marağına toxuna biləcək hansısa bir məqamla rastlaşmadım”.