"Bu sanksiyalar imkanlı rusları vahiməyə salmağa hesablanıb" - İqtisadçı
“Rusiyaya qarşı tətbiq edilən sanksiyalar həlledici təsirə malik deyil”.
Bu sözləri bakupost.az -a iqtisadçı ekspert Elşad Məmmədov deyib.
Onun sözlərinə görə, sanksiyalar daha çox psixoloji təzyiqə və Rusiyanın imkanlı təbəqələri arasında hansısa vahimənin, təşvişin yaradılmasına hesablanıb:
“Rusiya iqtisadiyyatına ən çox təsir edə biləcək sanksiyalar bir tərəfdən enerji daşıyıcıları ixracatına qoyulan məhdudiyyətlər, digər tərəfdən bank məlumatlarının ötürülməsi sistemindən Rusiyanın çıxarılması ola bilərdi. Amma biz görürük ki, hələ o istiqamətlərdə qərarlar yoxdur, çox güman ki, heç olmayacaq da”.
Ekspert Qərb ölkələrinin bu sanksiyalara olan yanaşmasını da dəyərləndirib:
“Qərarların qəbul edilməsi Rusiyadan daha çox həmin sanksiyaları tətbiq edən ölkələrə mənfi təsirini göstərə bilər. Ona görə də düşünürəm ki, bu sanksiyalar daha çox psixoloji təzyiqə və Rusiyanın imkanlı təbəqələri arasında vahimənin, təşvişin yaradılmasına istiqamətlənib. Düzdür, müəyyən təsirlər olacaq, amma burada Rusiya iqtisadiyyatı üçün təsirləri gözləmək mümkün deyil”.
E.Məmmədov enerji daşıyıcıları ixracatına və bank məlumatlarının ötürülməsi sistemi ilə bağlı sanksiyaların tətbiq edilmə ehtimalının olmadığını bildirib.
“Bu qərarların tətbiq edilmə ehtimalı çox aşağıdır və Qərbdə hesablamağı bacarırlar. Onlar yaxşı anlayır ki, o qərarların qəbul edilməsi Qərb üçün daha ağır nəticələrlə yekunlaşa bilər”,- deyə o, fikirlərini sonlandırıb.
