Peskov Putinin "nüvə təhdidi"ndən danışdı - Burada başa düşülməyən nə var?
Rusiya prezidenti Vladimir Putinin strateji çəkindirmə qüvvələrinin (nüvə silahı ilə bağlı-red.) xüsusi rejimə keçməsi ilə bağlı sözlərində ikili məna yoxdur.
Bu barədə Rusiya prezidentinin sözçüsü Dmitri Peskov bazar ertəsi jurnalistlərə bildirib.
"Siz onun (Vladimir Putinin) dünənki bəyanatını eşitmədiniz? Nə başa düşmək lazımdır? Burada nə ikinci məna var - hər şey açıq şəkildə ifadə olunub. Bu, Ali Baş Komandan tərəfindən strateji çəkindirmə qüvvələri üçün tamamilə hərtərəfli əmrdir”, - deyə Peskov prezidentin dünənki bəyanatını daha ətraflı şərh etmək istəyərkən deyib.
Bundan əvvəl prezident Putin müdafiə naziri Sergey Şoyqu və Baş Qərargah rəisi Valeri Gerasimovla görüşdə Qərb dövlətlərinin Rusiyaya qarşı "qeyri-dost hərəkətlər" və "qanunsuz sanksiyalar" tətbiq etdiklərini bildirib.
Daha sonra Putin Rusiya ordusuna nüvə qüvvələrini "xüsusi hazırlıq" vəziyyətinə gətirməyi əmr edib.
ABŞ cavab olaraq NATO-nun Rusiyanı təhdid etmədiyini bildirib və Putinin əmrini “mövcud olmayan təhdidlər”ə cavab adlandırıb.
Rusiya fevralın 24-də Ukraynada müharibəyə başlayıb.
