Rusiya ordusu Kiyevi mühasirəyə almaq üçün qüvvələri səfərbər edir
Ukrayna Silahlı Qüvvələrinin Baş qərargahı müharibənin 7-ci günündə Rusiya işğalçı qüvvələri ilə döyüşlərin gedişi barədə operativ məlumat yayıb. Məlumatda deyilir ki, Rusiya ordusunun Xerson və Nikolayev istiqamətində irəliləməsi davam edir, Mariupol şəhərinin mühasirəyə alınması üçün fəaliyyətlər göstərilir.
Habelə Rusiya ordusu paytaxt Kiyevə Podolsk və Siversk istiqamətlərindən hücum cəhdlərini davam etdirir. Podolsk istiqamətindən düşmən 13 batalyon-taktiki qruplaşmasının köməyi ilə Qoreniçi, Hostomel, Demidov istiqamətinə hərəkət edir, məqsəd Kiyevi şimal və şimal-qərb istiqamətlərindən mühasirəyə almaqdır.
Jitomir vilayətində Rusiyanın 5-ci ümumqoşun ordusunun 3 batalyon-taktiki qruplaşması cəmləşdirilib. Şimal istiqamətində Rusiya qoşunlarının 17 batalyon-taktiki qruplaşması canlı qüvvə və texnika sarıdan böyük itkilər verməsinə baxmayaraq Kiyevi şimal-şərq istiqamətindən mühasirəyə almağa çalışır.
Düşmən Kozolets, Bobrovitsa, Makeyev yaşayış məntəqələri istiqamətində dayandırılıb. Svetilnaya, Pobeda, Ostroluçye istiqamətlərində hücum potensialını itirib. Bundan əlavə, Sum, Lebedin və Axtırka şəhərlərini mühasirədə saxlamağa yönəlmiş uğursuz cəhdləri davam etdirir.
Slabojansk istiqamətində Rusiyanın 16 batalyon-taktiki qruplaşması Krasnoqrad istiqamətində hücumu davam etdirir. “Qəsbkar ciddi itki verib və Boqoduxov, Çuquyev və Şevçenko yaşayış məntəqələri ətrafında dayandırılıb. Tavriya istiqamətində düşmən hücum fəaliyyətlərini davam etdirir, yenidən qruplaşaraq Xerson və Nikolayev istiqamətində irəliləyir. Qara dəniz əməliyyat rayonunda Rusiya qoşunları gəmi qruplaşması formalaşdırıb və dəniz-desant əməliyyatının keçirilməsinə hazırlıq görür”, - məlumatda deyilir.
