Putin Zelenski ilə niyə görüşmür?
Ukrayna Prezidenti Volodimir Zelenski müharibəni dayandırmaq üçün rusiyalı həmkarı Vladimir Putinə müraciət edib. Paytaxt Kiyevdə xarici jurnalistlərə müsahibə verən Zelenski Putini danışıqlara çağırıb.
"Bizdən nə istəyirsən? Torpağımızı tərk et. İndi getmək istəmirsənsə, mənimlə danışıqlar masasına əyləş. Mən azadam. Mən normal adamam, mənimlə otur, danış. Nədən qorxursunuz? Biz heç kimi təhdid etmirik, biz terrorçu deyilik. Biz bankları ələ keçirmirik. Başqalarının torpaqlarını da ələ keçirmirik. Makronla danışdığın kimi 30 metrdən danışma, biz qonşuyuq. Gəl, mənimlə danış", - deyə Zelenski vurğulayıb.
Lakin Zelenskinin görüş təklifinə Rusiyadan hələlik müsbət reaksiya gəlməyib.
Bəs, Putin Zelenski ilə görüşə razılıq verəcəkmi?
Bu barədə modern.az-a danışan politoloq İlqar Vəlizadə bildirib ki, həm Kiyevin, həm də Moskvanın tələbləri bəllidir. İndiki durumda ortaq nəticədə gəlmək elə də asan məsələ deyil:
“İki tərəfin də tələblərində ciddi fikir ayrılıqları var. Heç kəs öz fikrindən dönmək niyyətində deyil. Buna görə də, danışıq aparmaq Putin üçün əlverişli görsənmir. Bilir ki, Zelenski öz mövqelərindən dönən deyil. Çox güman ki, onun bir məqsədi var və buna doğru irəliləyir. Putin öz planında hər hansı dəyişiklikllər etmək niyyətində deyil”.
Politoloqun sözlərinə görə, hazırda Zelenskinin əsas istəyi atəşkəsdir:
“Zelenski gördüklərini, yəni hərbi əməliyyatların nəticələrini ön plana çəkərək vurğulayıb ki, danışıqlara hazırdır. Bu sadəcə olaraq, Zelenski üçün hərbi əməliyyatları dayandırmaq naminə bir şans və ya vasitədir. Ukrayna Prezidenti özü məqsədinin hərbi əməliyyatları dayandırmaq olduğunu bildirib. Ancaq, qarşı tərəf, çox güman ki, hərbi əməliyyatları dayandırmaq istəmir, yaxud bunu lüzum bilmir. Ona görə də, danışıqlar aparmaq mənasız görsənir”.
