"Putin Ukraynada qalib gəlsə, növbəti hədəfi Litva olacaq" - "QORDON" nəşri

"Rusiya prezidenti Vladimir Putinin Ukrayna ilə müharibədə qələbə qazanacağı təqdirdə növbəti işğal etmək istədiyi ölkə Litva olacaq", - bunu Ukrayna Milli Təhlükəsizlik və Müdafiə Şurasının katibi Aleksey Danilov Ukrayna kəşfiyyatının məlumatlarına istinadən bəyan edib.

Bu barədə "QORDON" internet-nəşrinin müxbiri məlumat verib.

Avropa İttifaqının xarici işlər üzrə ali nümayəndəsi Jozep Borrel martın 12-də "CNN Türk" telekanalına verdiyi müsahibəsində deyib ki, Avropa və NATO Ukraynaya dəstək verir, lakin "böyük müharibənin qarşısını almağa cəhd edir". O, ehtiyat edib ki, Rusiya prezidenti Putin "öz hərbi fəaliyyətini genişləndirə və NATO ölkələrinə hücum edə bilər".

Danilov hesab edir ki, bu ölkə Litva ola bilər.

"Bizim anladığımız qədər və kəşfiyyatımızın məlumatlarına əsaslanaraq söhbətin Litvadan getdiyi aydın olur. Rusiya dayanmaq fikrində deyil. Onun növbəti məqsədi var. Allah eləməsin, bu müharibədə qalib gəlsə, Putinin işğal etmək istədiyi növbəti ölkə Litva olacaq", - Danilov bəyan edib.

Onun sözlərinə görə, daha sonrakı hədəflər digər Baltikyanı ölkələr və Polşa ola bilər.

"Hər şey NATO-nun davranışından asılı olacaq. Bu gün onun davranışı bir qədər təəccüblüdür. Bu alyansa daxil olan ölkələr hesab edir ki, bu tale onlardan yan keçəcək. Bizim çiyinlərimizdə təkcə Avropanın deyil, Avropada yerləşən NATO ölkələrinin də təhlükəsizliyi dayanıb", - Danilov belə hesab edir.

"Biz bunu anlayırıq, biz xahiş edirik ki, bizə yardım etsinlər. Siz döyüşmək istəmirsiniz, biz özümüz döyüşməyə hazırıq. Bizə düşməni məhv etmək üçün müasir silahlar verin. Bu gün bizim sizdən xahiş edəcəyimiz tək budur", - o, sözlərinə yekun vurub./Moderator.az