Ərdoğanın yeni rəqibi - Müxalifət onu vahid namizəd seçir

Türkiyənin müxalifət partiyaları prezidentliyə vahid namizəd axtarışına başlayıb.

Türkiyə mediası xəbər verir ki, müxalif Cümhuriyyət Xalq Partiyasının (CHP) lideri Kamal Kılıçdaroğlu artıq öz namizədini müəyyənləşdirib. Belə ki, Kılıçdaroğlunun ölkənin sabiq baş naziri, Gələcək Partiyasının sədri Əhməd Davudoğlunun prezidentliyə namizəd olması təklifini dəstəklədiyi bildirilir.

Gələcək Partiyasının sədr müavini Mustafa Gözəlin sözlərinə görə, CHP liderinin namizədi məhz Davudoğludur. Digər müxalifət partiyalarının da Davudoğlunun namizədlik təklifinə isti yanaşdığı deyilir.

Doğrudur, hələlik bu barədə partiyalar tərəfindən rəsmi qərar verilməyib. Bununla belə, keçmiş baş nazirin müxalifətin vahid təmsilçisi kimi seçkilərə qatılma ehtimalı yüksək qiymətləndirilir.

Məlumat üçün bildirək ki, Türkiyənin keçmiş baş naziri Əhməd Davudoğlu AKP-dən ayrıldıqdan sonra özünə yeni müxalif partiya yaradıb. Ötən ilin dekabrın 13-də Ankarada Gələcək Partiya adlı siyasi təşkilatın təqdimatı keçirilib. Partiyanın təsisçiləri 154 nəfərdən ibarətdir. Onlardan bir hissəsi hakim Ədalət və İnkişaf Partiyasından istefa verən şəxslərdir. Gələcək Partiyanın şüarı belədir: “Bizim bir gələcəyimiz var”. 

1959-cu ilin fevralın 26-da anadan olan Ə.Davudoğlu 2009-2014-cü illərdə Türkiyənin xarici işlər naziri, 2014-2016-cı illərdə baş naziri vəzifəsini tutub. 2014-2016-cı illərdə hakim Ədalət və İnkişaf Partiyasınn sədri olub. 2016-cı ilin mayın 22-də baş nazir vəzifəsindən istefa verib.

O, 2019-cu ilin sentyabrın 13-də Ədalət və İnkişaf Partiyası üzvlüyündən çıxıb. 

Qeyd edək ki, bir müddət əvvəl Türkiyənin 6 müxalifət partiyasının liderləri ilk dəfə bir araya gəlib. Görüş CHP lideri Kamal Kılıçdaroğlunun dəvəti ilə baş tutub. Toplantıda İYİ Partiya sədri Meral Akşener, Səadət Partiyasının sədri Temel Karamollaoğlu, Demokrat Partiyasının sədri Gültekin Uysal, DEVA Partiyasının sədri Əli Babacan və Gələcək Partiyasının sədri Əhməd Davudoğlu iştirak ediblər.

Görüş zamanı seçkilərlə bağlı əməkdaşlıq imkanlarının öyrənilməsi, prezidentliyə vahid namizədin necə təyin olunacağı kimi məsələlərin müzakirəsi həyata keçirilib.

Onu da xatırladaq ki, Türkiyədə 2023-cü ilin iyun ayında növbəti prezident seçkiləri keçiriləcək. Seçkilərə bir ildən çox vaxt qalmasına baxmayaraq, Türkiyə cəmiyyətində indidən müzakirələr qızışıb, prezidentliyə iddia edən bəzi namizədlər ortaya atılıb.

Hazırkı dövlət başçısı Rəcəb Tayyib Ərdoğanın seçim şansı rəqiblərinə nisbətdə daha yüksək qiymətləndirilir. Ehtimal olunur ki, o növbəti seçkidən də qalib ayrılaraq, yenidən Türkiyənin prezidenti postuna seçiləcək.