Suriyalı muzdlular müharibədə hansı səbəbdən iştirak edirlər? - Ukrayna MN açıqladı

Suriyalı muzdlular Ukrayna müharibəsində iştiraklarını, gələcəkdə Avropa ölkələrinə qeyri-qanuni miqrasiya şansı kimi görürlər.

Bu barədə Ukrayna Müdafiə Nazirliyi sosial şəbəkə hesabından paylaşım edib.

Qurumdan bildirilib ki, Rusiya Suriyadakı Xmeymim hərbi bazasının komandanlığına hər gün Ukraynaya 300 döyüşçü göndərmək tapşırığı verib. Martın 15-də Ukraynaya qarşı döyüşlərdə iştirak etmək üçün Xmeymim hərbi bazasından 150 muzdlunun Rusiyaya göndərildiyi deyilir.

Ukrayna hərbi kəşfiyyatının məlumatına görə, müharibə uzanmüddət davam edərsə Rusiya Ukraynadakı qüvvələrinə dəstək məqsədilə Suriyadakı hərbi bazasına topladığı silah, texnika və digər resursları Rusiya və Belarusa gətirməyi planlaşdırır.

Məlumatda qeyd olunur ki, Suriya Prezidenti Bəşər Əsəd Rusiyaya 40 min muzdlu döyüşçü təmin edəcəyinə dair söz verib. 

Rusiyaya göndərilən muzdlulara isə deyilir ki, onlar işğal olunmuş ərazilərdə asayişi bərpa etmək üçün polis funksiyasını yerinə yetirəcəklər: “Amma son vaxtlar muzdlular arasında Ukrayna ordusuna qarşı döyüş əməliyyatlarında birbaşa iştirakla bağlı məlumatlar paylaşılır.

Bundan əlavə, Ukraynadakı döyüşlərdə yaralanan 30-a yaxın suriyalı döyüşçü bu yaxınlarda Rusiyadan Xmeymim hərbi bazasına göndərilib. Bu isə digər muzdlulara psixoloji olaraq mənfi təsir etdiyindən, onların bəziləri Ukraynadakı döyüş əməliyyatlarında iştirak etməkdən imtina ediblər”.