"Rusiya icması rəsmi Bakının mövqeyinə aşkar hörmətsizlik edir" - AUK

"Azərbaycanın Rus İcması Respublika Şurası ölkənin rəsmi hakimiyyət orqanlarının mövqeyinə aşkar hörmətsizlik nümayiş etdirir".

Bu barədə “Azərbaycan Ukrayna Konqresi”nin (AUK) Azərbaycanın Rus İcması Respublika Şurasının bəyənatına cavab olaraq yaydığı bəyanatda deyilir.

“Bu mövqe dəqiq və aydındır. Azərbaycan Ukraynanın suverenliyini və ərazi bütövlüyünü tanıyıb və tanımaqda davam edir. Ukrayna Prezidenti Volodimir Zelenski ölkəmizin birmənalı və səmimi mövqeyinə görə Prezident İlham Əliyevə dəfələrlə minnətdarlığını bildirib. Azərbaycan Ukrayna Konqresi” Rusiyanın Ukraynaya qarşı başladığı müharibənin dəhşətli fəsadlarını narahatlıq və ürək ağrısı ilə izləyir. Milyonlarla ukraynalı dinc sakin qaçqına çevrilib. Rusiya Silahlı Qüvvələri Mariupol, Xarkov, Çerniqov, Nikolayev, İrpen, Buça, Qostomel, Xerson, Kiyev, Odessa və digər Ukrayna şəhərlərini bombardman edir. Mariupol şəhəri, təəssüf ki, az qala yer üzündən silinib. Mariupol Ukraynanın Ağdamıdır, Xirosimasıdır”, - AUK-un bəyanatında deyilir.

Bəyanatda bildirilir ki, həqiqətin Ukraynanın tərəfində olduğuna əminik: "Azərbaycan ordusu 44 günlük Vətən müharibəsində qalib gəldiyi kimi bu həqiqət də tab gətirəcək və qalib gələcək. Azərbaycan ordusu erməni işğalçılarına qarşı azadlıq müharibəsi aparırdı. Ukrayna ordusu öz ərazisində Rusiya ordusunun hücumlarını dəf edir.

Azərbaycanın Rus İcması Respublika Şurası bu aşkar faktı təhrif etmək qərarına gəlib və Ukrayna ərazisində baş verən faciəvi hadisələrin mahiyyətini kobud şəkildə təhrif edən bəyanatla çıxış edib. Ukrayna əhalisinin əhəmiyyətli hissəsini faşist kimi təqdim etmək cəhdi ikrah hissi doğurur. 2019-cu ildə Ukrayna Ali Radasına keçirilmiş son seçkilərdə heç bir radikal tələb olunan 5%-lik səsi qazana bilməyib. Hətta Avropanın demokratik ölkələrində belə bu cür aşağı nəticə yoxdur. Dövlətin birinci şəxsi isə rusdilli, yəhudi əsilli Ukrayna vətəndaşıdır. Demək olar ki, kiçik bir millətçi qrupu istisna olmaqla, 40 milyon ukraynalı onları öz ölkələrində tapa bilmir. Minlərlə kilometr məsafədən isə onların sayı inanılmaz dərəcədə çox görünür. Azərbaycan Rus İcması Respublika Şurasının bəyanatını qətiyyətlə pisləyirik”.