Rusiyanın əsl məqsədləri nədir? - NATO-nun eks-komandanı

NATO-nun keçmiş komandanı Uesli Klark Rusiya prezidenti Vladimir Putinin əsl məqsədini açıqlayıb.

O xəbərdarlıq edib ki, Putin Qərb hərbi ittifaqını məhv etmək üçün Şərqi Avropaya tam nəzarəti ələ keçirməyə çalışır.

Uesli Klark bu barədə CNN telekanalında danışıb.

"Putin Ukraynanı istəyir. Baltikyanı ölkələri istəyir. Şərqi Avropaya tam nəzarət etmək istəyir. O, NATO-nu məhv etmək istəyir ki, ABŞ çıxıb getsin".

Klarkın sözlərinə görə, indi Rusiya prezidenti sadəcə olaraq elə edir ki, sanki ona ancaq Ukrayna lazımdır.

O, həmçinin ABŞ və onun NATO müttəfiqlərini Ukraynaya hərbi yardımı artırmağa, o cümlədən döyüş təyyarələri verməyə çağırıb:

"Ukrayna sadəcə hazırkı döyüş meydanıdır. Amma ukraynalılar bu döyüş meydanında Rusiyanı məğlub etsələr, hər şey dəyişəcək. Ona görə də müdafiənin ən yaxşı yolu Ukraynaya döyüş meydanında Rusiya ilə mübarizə aparmağa kömək etmək üçün lazım olan yardımı verməkdir”.

Klark deyir ki, rus qoşunlarının növbəti hədəfi Dnepri tutmaq olacaq ki, məqsəd də Ukrayna Silahlı Qüvvələrini iki yerə parçalayıb mühasirəyə salmaqdır.

Ukrayna Ordusunun Baş Qərargahı bildirir ki, ruslar hazırda Donbassda gələcək döyüşlər üçün qoşun və texnikanı yenidən toplamaqda davam edir.

Ağ Evin məlumatına görə, Putin Kiyevə hücumun uğursuzluğu fonunda ən azı yeni bir qələbə qazanmağa çalışacaq.

Prezident Baydenin milli təhlükəsizlik müşaviri Ceyk Sallivan Rusiya-Ukrayna müharibəsinin aylarla və daha uzun müddətə davam edə biləcəyini söyləyib.