Brüssel görüşündən nə gözləmək olar? - "Kreml çalışır ki, Ermənistan..."

"Bu dəfə də Brüssel danışıqları daha çox Qərbin Ermənistana təzyiq edərək onu Rusiyanın əlindən almaq məqsədinə hesablanıb. Çünki görürlər ki,  Paşinyan Sorosun “uşağı” olsa da, onların planlarını düzgün həyata keçirə bilmir. Adam axşam bir şey danışır,  hər hansı bir məsələyə “hə” deyir, sabahı isə yuxuda gördüyünə uyğun olaraq “yox” deyir. Amma bununla o, manevr etmək istəyirsə, Ermənistanın manevr etmək imkanı yoxdur”. 

Bunu politoloq Cümşüd Nuriyev söyləyib.

“Diqqət edin ki, Avropa – Brüssel səfəri gündəmə gələn kimi Putin həm İlham Əliyevə, həm də Paşinyana zəng etdi. Amma Paşinyandan fərqli olaraq Rusiyanın paytaxtında Beynəlxalq Münasibətlər İnstitutu kimi nüfuzlu bir təhsil mərkəzinin məzunu olan və bu və ya digər səbəblərdən Kreml rəhbərliyinin hansı gedişlər edəcəyini öncədən bilən İlham Əliyevin bu dəfə də Brüsseldə səhv addım atacağını gözləmirəm” –deyə politoloq əlavə edib.

“Bu dəfə Belçika paytaxtındakı görüşlərdən  Azərbaycan-Ermənistan arasında sülh sazişi üçün işçi qrupunun yaradılmasını gözləmək olar. Sülh sazişinin özünün əldə olunması hələ qeyri-mümkün görünür. İkincisi də sərhədlərin delimitasiya və demarkasiya məsələsi razılaşdırıla bilər. Zəngəzur dəhlizinin açılmasının müzakirəsi o qədər də gözlənilmir. Çünki Qərb həmin dəhlizin açılmasında çox da maraqlı deyil. Bu, Rusiya üçün daha maraqlıdır. Azərbaycana isə Zəngəzur dəhlizi Turan ideyası müstəvisində çox lazımdır. Onsuz da İran ərazisindən biz Naxçıvana yeni yol çəkməyə hazırlaşırıq. Amma 10 noyabr razılaşmasına görə Rusiyanın nəzarət etməli olduğu Zəngəzur dəhlizinin açılması da Azərbaycan üçün sərfəlidir. Digər tərəfdən, ola bilsin ki, İranla dəhliz barəsində bağlanmış saziş Avropanı qıcıqlandırsın.  O zaman Qərb də çalışacaq ki, Zəngəzur dəhlizi açılsın. Bu baxımdan gələcəkdə bir-birinə alternativ olaraq həm İrandan, həm Zəngəzurdan keçəcək dəhlizdən istifadə olunması Azərbaycan üçün daha məqbul olar”- həmsöhbətimiz deyib.  

“Bəs Rusiya müəyyən vasitələrlə sülh sazişi və sərhədlərin razılaşdıırlması məsələlərində addımlar atılmasına mane ola bilərmi?” sualını isə politoloq belə cavablandırıb.

“Sülh sazişi yox, amma delimitasiya məsələsi Rusiya üçün də maraqlıdır. Çünki bu saat Moskva üçün Ermənistana daha çox təzyiq olunması sərfəlidir.  Yəni, Kreml çalışır ki, Ermənistan Rusiyasız yaşaya bilməyəcəyini dərk etsin”.