"Rusiyanı Avropaya qovuşdurmaq əvəzinə, Ukraynaya hücum onu Çinin qucağına atıb"

"O, mənə hər zaman sülh və demokratiya adamı təsiri bağışlayıb...çox təəssüf..."

Putinin köhnə dostu "kiçik qardaşı"nın davranışından "dərindən məyusluq və kədər" içindədir.

İtaliyanın sabiq baş naziri Silvio Berluskoni bəyan edib ki, o, Rusiya prezidenti Vladimir Putinin davranışından "dərin məyusluq və kədər hissi" keçirir.

Bu barədə o, Romada özünün mühafizəkar "Forza İtalia" partiyasının qurultayında çıxışında bəyan edib.

Berluskoni uzun illər ərzində Rusiya lideri ilə sıx dostluq münasibətləri saxlayıb. 2015- ci ildə o, deyib ki, Putin, "heç şübhəsiz, dünya liderləri arasında birinci yerdədir", bir dəfə isə onu özünün "kiçik qardaşı" adlandırıb.

İndi isə Berluskoni deyir ki, Putin Ukraynaya hərbi müdaxilə üçün bütün məsuliyyəti öz üzərinə götürməlidir.

"Mən onu 20 ildir tanıyıram və o, mənə hər zaman sülh və demokratiya adamı təsiri bağışlayıb...Çox təəssüf", - Berluskoni deyib.

O, qeyd edib ki, partiyanın mövqeyi matın 1- də Avropa Parlamentinin növbədənkənar sessiyasında qəbul edilən "Rusiyanın Ukraynada təcavüzünə qarşı qətnamə"də sərt şəkildə ifadə edilib və "mən o qətnaməyə əminliklə səs vermişəm".

Berluskoninin sözlərinə görə, Ukraynanın Buça şəhərində və digər yerlərində dinc sakinlərin kütləvi qətllərininin, əsl hərbi cinayətlərinin dəhşəti fonunda Rusiya öz məsiliyyətini inkar edə bilməz.

"Əksinə, o, özünün maraqları naminə hətta müharibə zamanı qanun və mənəviyyata uyğun olmayan davranışa görə məsuliyyət daşıyanları aşkar etməli və məhkəmə qarşısına çıxarmalıdır".

"Rusiyanı Avropaya qovuşdurmaq əvəzinə, Ukraynaya hücum onu Çinin qucağına atıb...çox təəssüf, çox təəssüf edirəm", - o, təkrar edib.

Rusiyanın Ukraynaya fevralın 24- də hərbi müdaxiləsindən sonra bu fikirlər Berluskoni tərəfindən Putin haqqında ilk dəfə səsləndirilib.

Bu gün 85 yaşı tamam olan Silvio Berluskoni bir neçə müddətlərdə- 1994- 1995, 2001- 2006 və 2008- 2011- ci illərdə İtaliyanın baş naziri olub.