Rusiya Mariupolda kimyəvi silahdan istifadə etdi...

“Donetsk Xalq Respublikası”nın nümayəndəsi Eduard Basurin Mariupoldakı “Azovstal” zavoduna basqın zamanı kimyəvi silahdan istifadənin mümkünlüyünü etiraf edib.

“RİA Novosti” xəbər verir ki, bu barədə Basurin brifinqdə bildirib.

"Orada ("Azovstal" zavodunda) yeraltı mərtəbələr var, ona görə də bu obyekti çoxsaylı itkilərlə tutmağın mənası yoxdur. Ona görə də hazırda bu zavodun bloklanması ilə məşğul olmaq, bütün çıxış və girişləri tapmaq lazımdır. Bundan sonra kimyəvi silahdan istifadə etmək olar. Prinsipcə, bunu etmək olar”, - Basurin deyib.

***

Donetsk vilayətinin Mariupol şəhərində ruslar hərbçilərə və mülki şəxslərə qarşı naməlum zəhərli maddədən istifadə ediblər.

UNİAN-nın yaydığı məlumata görə, Mariupolda drondan zəhərli maddə atılıb.

Qeyd edilib ki, qurbanlarda tənəffüs çatışmazlığı və vestibulo-ataktik sindrom (damar sistemində nasazlıq yaradır) var.

“Təxminən bir saat əvvəl Rusiya işğalçı qüvvələri Mariupol şəhərində ukraynalı hərbçilərə və dinc sakinlərə qarşı düşmənin PUA-sından atılan mənşəyi naməlum zəhərli maddədən istifadə edib”, - məlumatda bildirilib.