"Əgər Putin Ukraynanı işğal etsə, ətrafındakı bütün respublikalara ultimatum verəcək" - Rəsul Quliyev

“Vladimir Putinin Ukraynanı işğal etmək cəhdi bir sıra ölkələrdə gərginlik yaradıb. Avstriyanın kansleri Moskvada Putinlə görüşəndən sonra verdiyi intervyuda dedi ki, o, müasir həyatla deyil, özü üçün yaratdığı dünyada yaşayır, çox təhlükəli adamdır. Bu, həqiqətən belədir”.

Azsiyaset.com xəbər verir ki, bu fikirləri Azərbaycanın sabiq spikeri Rəsul Quliyev özünün sosial şəbəkə hesabında bildirib.

R.Quliyev qeyd edib ki, Putin Ukraynanı işğal edəcəyinə inanır:

“Baxmayaraq bu heç vaxt baş verməyəcək. Əlavə 100 min də dinc əhali öldürəcək, ancaq qorxusundan Ukrayna silahlı qüvvələri ilə üzbəüz vuruşmaqdan çəkinəcək. Bu adam Sovet dövründə istehsal edilmiş raketləri hara gəldi atacaq. Əgər Putin Ukraynanı işğal etsə, ətrafındakı bütün respublikalara ultimatum verəcək. Müharibə gedə-gedə də ultimatum verə bilər. Artıq bütün dünya rus ordusunun dünyanın nəinki 2-ci, heç 30-cu ordu da olmadığını başa düşür. Sözsüz, Polşa, Türkiyə və başqaları da bunu bilir. Bədbəxtlik Putinin hələ də rus ordusunun 2-ci ordu olduğuna inanmasıdır. Çünki o, real yox, özünün yaratdığı dünyada yaşayır. Hərdən rusların televiziya və qəzetlərinə izlərinə baxıram. Heç vaxt ağ yalan üzərində qurulmuş bu səviyyədə iyrənc verilişlərə, yazılara rast gəlməmişəm. Azərbaycanla Ermənistanda imzaladığı sənədin həyata keçməsinə Putin mane olur. İndi Putin onu Moskvaya çağırıb hədələyəcək, o, müqaviləyə imza atmağın Ermənistan üçün ağır nəticələr verəcəyini deyəcək. Paşinyan Azərbaycanla müqaviləyə imza atmazsa, ölkəsini çox ağır vəziyyətə salacaq. Azərbaycanın vəziyyəti yaxşıdır. Çünki  hərbi potensialı qat-qat yüksək olan Türkiyə Azərbaycanın dostu, qardaşıdır. Ermənistan təcili Türkiyə ilə də müqavilə bağlamalıdır. Ölkəsinin taleyini Putin Rusiyasına bağlamaq ən böyük ağılsızlıqdır. İnanıram ki, Paşinyan bunu  başa düşür. Paşinyanın Putinə nifrət etdiyi məlumdur".

R.Quliyev daha sonra qeyd edir: Ancaq daxildəki ruspərəstlərdən qorxur. Elə buna görə də Türkiyə ilə sazişə yaxın düşmür. Əminəm ki, Azərbaycan qorxulu cərəyanların getdiyi indiki vəziyyətdən də qalib çıxacaq. Paşinyanla danışıb müqaviləni imzalamalı və Putini fakt qarşısında qoymaq lazımdır”.