"Ukraynanın cənub sakinləri hər zaman Rusiyaya meyl edib" - Krımdan ola senator

Rusiyada Ukrayna ərazilərindən yeni  quberniyası yaratmağa açıq çağırış edilib.

Ukraynada müharibənin yeni məqsədlərinin- Donbasın və ölkənin cənubunun zəbt edilməsi elan edilməsindən sonra Rusiya Federasiya Şurasında Rusiyanın yeni ərazi vahidinin-Tavriya diyarının yaradılması ideyası dəstəklənib.

Bu barədə "RİA Novosti" agentliyi məlumat yayıb.

Nəzərdə tutulub ki, Tavriya diyarının tərkibinə Ukraynanın Xerson vilayəti, Nikolayev və Zaporojye vilayətlərinin bir hissəsi daxil ediləcək.

"Bu, düzgün, yaxşı təklifdir, Ukraynanın cənub sakinləri hər zaman Rusiyaya meyl edib. Beləliklə, Tavriya quberniyası öz tarixi çərçivələrində bərpa ediləcək. Bu quberniyaya həmçinin Krımla Sevastopol daxil ola bilər", - bunu Krımdan olan senator Sergey Tsekov bəyan edib.

Tavriya diyarını onun tarixi çərçivələrində bərpa edilməsi Dövlət Dumasının hələ aprelin əvvəlində keçirilən iclasında deputat Mixail Şeremet tərəfindən təklif edilib. O, qeyd edib ki, bu birləşmədə həlledici rol Krımın üzərinə düşür.

Tavriya quberniyası ( Tavrida və ya Tavriya) 1802- ci ilin oktyabrından 1921- ci ilin oktyabrınadək Rusiya imperiyasının inzibati- ərazi vahidi olub. Onun tərkibində səkkiz qəza olub: Berdyansk, Melitopol, Dnepr, Perekopsk, Yevpatori, Simferopol, Feodosiya və Yalta.

Dünən Rusiya Federasiyasında açıq şəkildə Donbasın və Ukraynanın cənub regionlarını zəbt etmək və  bununla da Krıma quru yol açmaq barədə bəyan edilib.

Bundan başqa, Ukraynanın cənubunun işğalı "Dnestryanı"ya daha bir çıxışı" təmin etməlidir, çünki Kreml orada da "rusdilli əhalinin sıxışdırıllması faktları"nı aşkar edib.

Moldovada məlumat verilib ki, belə bəyanatlar Rusiya Federasiyasının respublikanın suverenliyi və ərazi bütövlüyünü dəstəkləməsi mövqeyinə ziddir. Moldova XİN Rusiyanın ölkədəki səfiri Oleq Vasnetsovu çağıraraq, "rusiyalı məmurun sözlərindən dərin narahatlığını ifadə edib".