"3+3"ün yeni iclasına hazırlıq gedir
"Cənubi Qafqaz üzrə 3+3 platformasının ikinci görüşünə hazırlıq gedir".
"RIA Novosti" xəbər verir ki, bunu Rusiya XİN-in təmsilçisi Denis Qonçar bildirib.
Onun sözlərinə görə, Rusiya Federasiyası, Azərbaycan, Ermənistan, Türkiyə xarici işlər nazirlərinin müavinləri və İran Xarici İşlər Nazirliyin baş direktorunun həmsədrliyi ilə 3+3 regional məsləhətçi platformasının ilk iclası 2021-ci ilin dekabrında Moskvada keçirilib. Bundan əvvəl Gürcüstan Xarici İşlər Nazirliyi Tbilisinin regional məsləhətləşmə mexanizmində iştirakdan imtina etdiyini təsdiqləyib.
"3+3 Məşvərətçi Regional Platformasının ikinci iclasına hazırlıq gedir. Tədbirin keçirilmə yeri və vaxtı açıqlanacaq. Əminəm ki, təyin olunmuş gündəm Gürcüstanın da maraqlarına tam uyğundur və bütün iştirakçı ölkələrin ümumi razılığı ilə rəsmi Tbilisi üçün qapılar açıq qalır", - deyə Denis Qonçar vurğulayıb.
Diplomat əlavə edib ki, bu cür əməkdaşlıq məsələlərin kollektiv şəkildə nəzərdən keçirilməsini nəzərdə tutur, siyasi ziddiyyətləri kəskinləşdirmir, əksinə, qarşılıqlı etimadın artmasına töhfə verir.
Onun sözlərinə görə, prioritet istiqamətlər ticarət, energetika, sənaye, innovativ texnologiyalar, infrastrukturun modernləşdirilməsi sahələrində qarşılıqlı faydalı layihələrin həyata keçirilməsidir.
