ABŞ hərbi bazasında Ukraynaya dair qapalı müşavirə: 40 ölkənin hərbi komandanı qatıldı - "Vaşinqton Post"
Aprelin 26-sı dünyanın 40-dan çox ölkəsinin hərbi komandanı ABŞ Hərbi Hava Qüvvələrinin Almaniyanın Ramştayn şəhərindəki aviasiya bazasına toplaşıb.
Toplantıda rus işğalına qarşı mübarizədə Ukraynaya göstərilən hərbi dəstəyin nizamlı, koordinasiyalı şəkildə həyata keçirilməsi məsələləri müzakirə olunur.
Hərbi komandanları Ramştayn aviabazasına ABŞ Müdafiə naziri Lloyd Ostin yığıb. O, NATO üzvləri ilə yanaşı alyansın üzvü olmayan bəzi dövlətlərin hərbi liderlərini də bu müzakirəyə dəvət edib.
“Vaşinqton Post” qəzetinin internet səhifəsində yayılan xəbərə görə, Lloyd Ostin görüş zamanı bildirib ki, Ukraynanın müqaviməti azad dünyaya qol-qanad verib və NATO-nu daha cəsur addımlar atmağa ruhlandırıb: “Rusiya Prezidenti Vladimir Putin dünyanın Ukrayna ətrafında bu qədər sürətlə və qətiyyətlə toplaşacağını ağlına da gətirməzdi”.
“Vaşinqton Post” yazır ki, ABŞ-ın Müdafiə naziri Ramştayn aviabazasındakı toplantıda Ukraynanın qələbə çalacağına əmin olduğunu vurğulayıb. O, toplantıya qatılan 40-dan çox ölkənin hərbi liderləri adından bildirib ki, burada hər kəs, o cümlədən Ukraynanın özü qələbəyə inanır. Lloyd Ostin Rusiya-Ukrayna müharibəsinin hazırda yeni mərhələyə qədəm qoyduğunu da söyləyib.
Lloyd Ostin aprelin 24-də ABŞ-ın dövlət katibi Entoni Blinkenlə bərabər Kiyevdə səfərdə olub, Ukraynanın Prezidenti, xarici işlər, müdafiə və daxili işlər nazirləri ilə birgə aparılan danışıqlarda iştirak edib.
