"Paşinyan heç kimə etibar etmir və özünü hamıdan qoruyur..." - "Past" qəzeti
Ermənistan baş naziri Nikol Paşinyanın qondarma erməni "soyqırımı"nın 107-ci ildönümü ilə əlaqədar İrəvandakı üzdəniraq abidəyə ziyarəti zamanı bütün memorial kompleksdə görünməmiş təhlükəsizlik tədbirləri görülüb.
Bu haqda qəsbkar ölkənin “Past” qəzeti məlumat yayıb.
"Memorialın ərazisinə görünməmiş sayda polis əməkdaşı cəmləşib, ziyarətçi axını tamamilə dayandırılıb. Paşinyan özü komanda üzvlərindən ayrılıqda abidəni ziyarət edib. Baş nazirin yanında yalnız Ermənistan prezidenti Vaaqn Xaçaturyan və parlamentin spikeri Alen Simonyan olub. Digər hökumət üzvləri və deputatlar isə xeyli intervalla yeriyib və yalnız adıçəkilən şəxslər getdikdən sonra əbədi məşəl qarşısına çatıblar"- deyə erməni nəşri davam edir.
Nəşrin yazdığına görə, ümumiyyətlə, son vaxtlar Paşinyanın gərginliyi və qorxusu artıb. Nəşrin hökumət qurumlarındakı mənbəyinin bildirdiyinə görə, onun təhlükəsizliyini təmin edən əməkdaşların sayı, bundan əvvəl də görünməmiş dərəcədə çox olmasına rəğmən daha 15 nəfər artırılıb.
“Bizdə olan məlumatlara görə, Paşinyan heç kimə etibar etmir. O daha çox şübhəçi olub və hamıdan özünü qoruyur. Səfərlər zamanı, o cümlədən görüşlərdən sonrakı qəbullarda o, son dərəcə ehtiyatlı davranır,”, - erməni qəzeti belə yazır.
