Bu ölkədə Fransa mediasının yayımı dayandırıldı
BMT Mali hökumətini Fransanın RFI radiosu və “France 24” telekanalının ölkədəki yayımını dayandırmaq qərarını ləğv etməyə çağırıb.
BMT-nin İnsan Haqları üzrə Ali Komissarlığının sözçüsü Ravina Şəmdasani rəsmi Bamakonun bu qərarından “dəhşətə gəldiklərini” bildirib.
Şəmdasani Bamakonu müstəqil jurnalistlərin ölkədə rahat işləməsinə şərait yaratmağa və bu qərarı ləğv etməyə çağırıb.
Mali hökuməti aprelin 28-də RFI və “France 24”-ün yayımlarını daimi olaraq dayandırdığını açıqlayıb. Qərar Mali ordusunun mülki əhaliyə qarşı qırğın törətməsi iddiasının irəli sürülməsindən sonra verilib.
Fransa mətbuatı martın əvvəlində Malinin Sequ bölgəsində 35 cəsədin olduğu kütləvi məzarlığın aşkarlandığını və bu şəxslərin Mali ordusu və Rusiyanın “Vaqner” qrupunun muzdluları tərəfindən öldürüldüyünü iddia edib.
