Sosial şəbəkələrdə Rusiya hərbçilərinin Ukraynadakı əməllərini göstərən görüntülər arxivləşdirilsin - ABŞ konqresmenləri
ABŞ Konqresinin dörd yüksək nüfuzlu üzvü (Demokrat partiyasından-red.) “YouTube”, “TikTok”, “Twitter” və “Meta”nın baş direktorlarına “Rusiyanın Ukraynadakı hərbi cinayətlərinin sübutu kimi istifadə oluna biləcək videogörüntülərin məzmununun qorunması və arxivləşdirilməsi” ilə bağlı rəsmi sorğu göndərib.
Bu barədə “NBC News” məlumat yayıb.
Məktub Nümayəndələr Palatasının üzvləri, Nəzarət komitəsinin sədri Kerolin Maloni, Xarici əlaqələr komitəsinin sədri Qreqori Miks, Milli təhlükəsizlik alt komitəsinin sədri Stiven Linç və Avropa, enerji, ətraf mühit və kibertəhlükəsizlik üzrə alt komitənin sədri Uilyam Kitinq tərəfindən imzalanıb.
Adları çəkilən konqresmenlər şirkətlərdən xüsusi olaraq "müharibə cinayətləri və digər vəhşiliklərin potensial sübutlarını ehtiva edən məzmunu saxlamağı" xahiş ediblər.
Sorğunun Rusiya hərbçilərinin Ukraynadakı əməllərinə dair görüntülərin sosial mediada çoxaldığı bir vaxtda gəlməsi hər kəsin diqqətini cəlb edib.
Konqresmenlərin bu cür sorğularla müraciəti ABŞ-da önəmli məsələ sayılır və adətən şirkələr qanunverici hakimiyyətin nümayəndələrinin müraciətlərini geri çevirmirlər.
