HƏMAS-İsrail münaqişəsinin başlamasından bir il ötür - Nə məlumdur?

Düz bir il əvvəl, 2023-cü il oktyabrın 7-də səhər tezdən Fələstinin silahlı Həmas qruplaşmasının üzvləri Qəzzadan İsraillə sərhəddəki ərazilərə hücumlar həyata keçirdilər və nəticədə, 1195 nəfər öldü, 254 nəfər isə girov götürüldü.

Buna cavab olaraq İsrail ertəsi gün Qəzza zolağına qarşı bu günə qədər davam edən kütləvi hava hücumları ilə cavab verib və anklavda quru əməliyyatlarına başlayıb.

Qəzza Səhiyyə Nazirliyinin məlumatına görə, bu günə kimi təxminən 60 faizi qadın və uşaq olmaqla 41,8 mindən çox fələstinli dünyasını dəyişib. Bu, Qəzza zolağının müharibədən əvvəlki bütün əhalisinin təxminən iki faizini təşkil edir.

Sektordakı bütün evlərin yarısı, kommersiya obyektlərinin 80 faizi və məktəb binalarının 85 faizi ya qismən, ya da tamamilə dağıdılıb. Bildirilir ki, onların bərpası yüz milyardlarla dollara başa gələcək.

Bu ilin may ayında BMT dağıntılar altında 10 min fələstinlinin cəsədinin qaldığını açıqlamış və bütün cəsədlərin çıxarılmasının üç ilə qədər vaxt apara biləcəyini hesablamışdı.

Bu il müharibədən əvvəl anklavda yaşayan 2,3 milyon fələstinlinin demək olar ki, hamısı köçkün vəziyyətinə düşüb.

HƏMAS tərəfindən oğurlanan 97 girovun taleyi məlum deyil. 117 girov İsrailə sağ-salamat qaytarılıb. Girov saxlanıldığı düşünülən bir sıra şəxslərin ya 7 oktyabr hücumu zamanı, ya da əsirlikdə olarkən öldüyü təsdiqlənir.
İsrail ordusunun mətbuat xidmətinin məlumatına görə, davam edən döyüşlər zamanı indiyədək 727 İsrail hərbçisi həlak olub.