"ABŞ Paşinyanı belə sülh sazişi hazırlamağa təşviq edə bilər" - Riç Outzen

“Hazırda masada olan diplomatik həll bir neçə fərqli variant təklif etdiyi üçün Konstitusiya dəyişikliyinin zəruri olduğu fikri ilə tam razı deyiləm. Məncə, daha ağıllı və daha real həll yolu ABŞ-nin Ermənistanı və İrəvanı Konstitusiyaya uyğun şəkildə, onunla ziddiyyət təşkil etməyən, açıq şəkildə ərazi iddialarının olmadığını və irredentizmin tamamilə rədd edildiyini göstərən ayrıca bir saziş hazırlamağa təşviq etməsi ola bilər. Bir dövləti konstitusiyasını dəyişməyə məcbur etmək isə çox çətin addımdır və açığı, Paşinyan üçün ciddi siyasi risk yaradar”.

"Azsiyaset" xəbər verir ki, bu fikirləri musavat.com-a açıqlamasında təqaüddə olan polkovnik, fəlsəfə doktoru, Atlantik Şurasının qeyri-rezident baş elmi işçisi və geosiyasi analitik Riç Outzen deyib.

Analitik fikrincə, ABŞ-nin müsbət rolu Paşinyanı və onun ətrafındakıları konstitusiya ilə eyni hüquqi gücə malik, Ermənistan qanunvericiliyinin bir hissəsinə çevriləcək, qonşulara qarşı ərazi iddialarının olmayacağına təminat verən yaradıcı hüquqi sənəd üzərində düşünməyə həvəsləndirmək ola bilər:

“Məncə, belə bir razılaşma realdır. Konstitusiyanın dəyişdirilməsini mütləq şərt kimi irəli sürmək isə ümumi prosesi tamamilə poza bilər. Buna görə də alternativ, lakin hüquqi cəhətdən qüvvədə olan bir saziş və təminat mexanizmi üzərində çalışmaq ABŞ-nin həm edə biləcəyi, həm də etməli olduğu bir addımdır”.

R.Outzen hesab edir ki, seçkilərə qədərki aylarda görülə biləcək çox iş var:

“Məncə, Nikol Paşinyan sülh istiqamətində irəliləməyə çalışmaqla müəyyən siyasi riskə gedib. Əgər irəliləyiş olmazsa, yeni iqtisadi layihələr başlamazsa, resurs axını baş verməzsə və yerində real dəyişikliklər görünməzsə, o, Ermənistanda seçicilər qarşısında çox zəif duruma düşəcək. Əksinə, əgər gözləntilər belə olsa ki, əldə olunacaq razılaşma Ermənistan xalqı üçün real iqtisadi fayda gətirəcək, o zaman bu, Paşinyanın seçki baxımından xeyrinə olacaq. Odur ki, beynəlxalq və regional tərəfdaşların etməli olduğu prosesi mümkün qədər sürətləndirməkdir. Düşünürəm ki, Tramp administrasiyası artıq bu istiqamətdə, Ermənistana bu sülhdən real iqtisadi faydaların düşəcəyini göstərən layihələr üzərində çalışır”.