"Rusiyanın raket gücü Qərbi Ukrayna üzrə sülhə razı saldı" - "The New York Times"

“The New York Times” Avropa diplomatik dairələrinə istinadən yazır ki, Rusiyanın sürətlə artan raket istehsalı Qərbi Ukrayna üzrə tezliklə sülh razılaşmasına razı olmağa məcbur edən əsas faktor olub.

Məlumata görə, Trampın xüsusi elçisi Den Driskoll Kiyevdə keçirilən qapalı görüşdə Avropa nümayəndələrinə kritik xəbərdarlıq edib. O bildirib ki, Rusiya artıq elə həcmdə uzun mənzilli raket istehsal edir ki, bu raketlər təkcə Ukraynaya mütəmadi zərbələr endirməyə yox, həm də eyni vaxtda böyük ehtiyat toplamağa imkan verir. Driskoll vurğulayıb ki, bu ehtiyat lazım olduqda Ukraynadan kənar hədəflərə də istifadə oluna bilər.

Avropalı diplomatlar bu məlumatı “son dərəcə narahatedici” adlandırıb və Driskollun təqdim etdiyi faktların onlarda “güclü təsir” yaratdığını bildiriblər.

“The New York Times” yazır ki, məhz bu təhlükə qiymətləndirilməsi Qərb ölkələrini Rusiyayla sülh danışıqlarına mümkün qədər tez başlamağın vacibliyinə inandıran əsas məqam olub.