DTX-nın dövlətə xəyanətə görə həbs etdiyi şəxs general İsmayıl Hüseynovun bibisi qızıdır

Dövlət Təhlükəsizliyi Xidmətinin keçirdiyi əks-kəşfiyyat tədbirləri və istintaq hərəkətləri nəticəsində həbs edilən Azərbaycan vətəndaşları – Abbasquliyev Həbib Əbil oğlu və onun həyat yoldaşı Abbasquliyeva Lamiyə Elxan qızının hansı məmurla qohum olduqları üzə çıxıb.

"Azsiyasət.com" xəbər verir ki, casusluq formasında dövlətə xəyanət etməsi ittihamı ilə tutulan L.Abbasquliyevanın Dövlət Gömrük Komitəsi sədrinin I müavini, general-mayor İsmayıl Hüseynovun bibisi qızı olduğu aydınlaşıb.

Dayısı oğlu general olan L.Abbasquliyeva ilə onların münasibətlərinin hansı səviyyədə olduğu hələlik məlum deyil.

İ.Hüseynov 14 il ərzində, yəni 2004-2018-ci illərdə Avtonəqliyyat Baş Gömrük İdarəsi rəisnin müavini və İdarənin rəisi vəzifələrində çalışıb. Ötən ilin may ayının 29-da Bakı Baş Gömrük İdarəsinin rəisi vəzifəsinə təyin olunub, 26 gün sonra, yəni 25 iyun 2018-ci ildə isə pDövlət Gömrük Komitəsi sədrinin birinci müavini vəzifəsinə təyin edilib.

Araşdırılmalıdır ki, Lamiyyə və həyat yoldaşı dövlət sirri təşkil edən məlumatları hardan və necə əldə edə biliblər? Bu işdə dövlətdə yüksək vəzifə tutan qohumlarının rolu olub, ya yox? Belə həssas bir zamanda, məncə, hər xırda detala diqqət edilməli və araşdırılmalıdı.

Qeyd edək ki, Dövlət Təhlükəsizliyi Xidmətinin keçirdiyi əks-kəşfiyyat tədbirləri və istintaq hərəkətləri nəticəsində, Azərbaycan vətəndaşları - Abbasquliyev Həbib Əbil oğlu və onun həyat yoldaşı Abbasquliyeva Lamiyə Elxan qızının casusluq formasında dövlətə xəyanət etmələrinə əsaslı şübhələr müəyyən edilib.

Müəyyən edilib ki, xarici xüsusi xidmət orqanı tərəfindən maddi maraq müqabilində məxfi əməkdaşlığa cəlb edilmiş Həbib Abbasquliyev və Lamiyə Abbasquliyeva Azərbaycanın dövlət təhlükəsizliyi zərərinə fəaliyyət göstərərək, müxtəlif ölkələrin ərazisində xarici xüsusi xidmət orqanının nümayəndələri ilə keçirilən gizli görüşlərdə verilən tapşırıqlara əsasən, dövlət sirri təşkil edən məlumatları və digər informasiyaları müntəzəm surətdə toplayaraq onlara təqdim ediblər.

Həbib Abbasquliyev və Lamiyə Abbasquliyeva Cinayət Məcəlləsinin 274-cü (dövlətə xəyanət) maddəsi ilə cinayət məsuliyyətinə cəlb edilərək barələrində məhkəmənin qərarı ilə həbs qətimkan tədbiri seçilib.

Cinayət işi üzrə zəruri istintaq hərəkətləri və əməliyyat-axtarış tədbirləri davam etdirilir.