Azərbaycan Qərbdəki ermənipərəst mövqeyə qarşı çıxmaqla bu işi həll etməlidir - İngilis politoloq

Qərbin bəzi dairələrinin riyakar əməlləri yenə də özünü açıq büruzə verir. Avropa İttifaqının Ermənistandakı missiyasının maşın karvanını az qala hərbi konvoy kimi müşayiət etməsi bu riyakarlığın əyani təzahürüdür. Hazırda Avropa ölkələrində tüğyan etməkdə olan islamofobiya və rasizm Avropanın çirkin iç üzünü bu məsələdə də növbəti dəfə nümayiş etdirir.

Avropa İttifaqının Quranın yandırılmasına qarşı heç bir tədbir görməməsi və bu çirkin əmələ haqq qazandırması və irqi ayrı-seçkiliyin artıq ictimai səviyyədən rəsmi strukturlar səviyyəsinə yüksəldiyini aydın göstərir. Bu gün guya Qarabağdakı ermənilərin qayğısına qalan, mövcud vəziyyətdən narahatlıq keçirən Avropa ölkələri 90-cı illərdə Ermənistanın işğalı nəticəsində Azərbaycanda bir milyon qaçqın və məcburi köçkün yaranmasından, humanitar fəlakətdən niyə narahatlıq keçirmirdi?

Britaniyalı politoloq və jurnalist Nil Uatson bildirib ki, Azərbaycana qarşı edilən ikitərəfli yanaşmanın fərqli səbəbləri var:

“Məncə, bu ikitərəfli yanaşmanın səbəbləri saysız-hesabsızdır. Birincisi, danılmazdır ki, sovet və rus təbliğatı çox uğurlu idi və bu hələ də davam edir. Keçmiş Sovet İttifaqı Qərb əhalisinin kütləsi, o cümlədən siyasətçilər tərəfindən zəif başa düşülür və bu, dezinformasiyanın yayılmasını asanlaşdırır.

İkincisi, Qarabağ münaqişəsinin arxasında duran səbəblər tarixə və dezinformasiyaya bürünüb. Qərbdə medianın, biznesin, siyasətin və incəsənətin bütün sahələrinə nüfuz etmiş erməni diasporu öz baxışlarını və miflərini yaymaqda davam edir.

Onlar bunu dini münaqişə və azərbaycanlılarla Osmanlı türklərinə fərq qoymadıqları üçün 1915-ci ildə iddia edilən hadisələrinin kompensasiyası kimi təqdim etməkdə son dərəcə uğurludurlar. Üçüncüsü, Qərbdə geniş yayılmış türkofobiya var. Bir çox ölkələrdə türklərə ikinci dərəcəli vətəndaş kimi yanaşılır və hər zaman, xüsusən də Rusiya tərəfindən türk birliyini boğmaq cəhdləri olub. Prezident Ərdoğanın dövründə bu durum dəyişdi.

Onun sözlərinə görə, dördüncü səbəb bütün cəmiyyətdə islamofobiyanın mövcud olmasıdır:

“Böyük Britaniyada inteqrasiya ən yüksək səviyyədədir, lakin İsveç, Avstriya və xüsusilə Fransada iki səviyyəli cəmiyyət mövcuddur. İfrat sağçılar yenidən yüksəlib və 1920-ci illərdə Almaniyada və digər Avropa ölkələrində yəhudilərlə olduğu kimi, müsəlmanlar cəmiyyətin günah keçilərinə çevriliblər. Fransada hicab qadağan edilib və sonuncu prezident seçkiləri Makronla Milli Cəbhənin qarşıdurması olub.

İqtisadi problemlərlə üzləşən Avropa siyasətçiləri üçün əhalinin bir hissəsini günahlandırmaq asandır. Qərbdə İslam sülh dini deyil, müharibə dini kimi qəbul edilir. Hesab edirəm ki, ikili standratları olan Avropada müsəlmanlar üçün öz dinlərinin həqiqətini və onun digər İbrahimi inanclarla oxşarlıqlarını əsas mediada göstərmək çox çətindir.

Eləcə də, yalnız 31 il əvvəl müstəqillik əldə etmiş Azərbaycan üçün öz perspektivlərini və Qarabağla bağlı haqlı hüquqi mövqeyini bildirmək çox çətindir. Azərbaycan müharibədə qalib gəldi; indi sülhü qazanmalıdır və Qərbdə hökm sürən ermənipərəst mövqeyə qarşı çıxmaqla sülh müqaviləsinin imzalanması üçün əlverişli şərait yaranacaq”(publika.az).