Araik Arutyunyan Rusiyaya niyə lazımdır? - TƏHLÜKƏLİ PLAN
Qarabağda həyata keçirilən müxtəlif təxribatların arxasında ciddi və təhlükəli məqamlar dayanır. Rusiya mürəkkəb oynayır. Qarabağdakı Rusiya sülhməramlıları özbaşına deyil və sülhməramlıların gündəlik bütün məlumatları Moskvaya ötürülür. Bütün bu məlumatları Rusiya Müdafiə Nazirliyi ələkdən keçirib rəsmi formada dərc edir. Rusiya prezidenti Putin Müdafiə naziri Sergey Şoyqunun təqdimatı ilə bu işə general Konaşenkonu təhkim edib. Konaşenko isə Rusiya Müdafiə Nazirliyinin İnformasiya və Kommunikasiyalar Departamentinin rəhbəridir.
O zaman sual olunur:
1. Rusiya sülhməramlılarının komandanı R.Muradov Araik Arutyunyanla birlikdə qondarma “dqr”-in bayrağının qaşırısında özbaşına şəkilə çəkdirə bilərmi? “dqr” nə üçün tərəf kimi qəbul olunur?
2. Sülhməramlıların Moskvaya ötürdüyü xəritə məlumatları Rusiya MN-nin rəsmi saytında özbaşına dərc edilə bilərmi?
3. Sülhməramlılar Xankəndidə orta məktəblərdə - Rusiya və “dqr”-in bayrağının olduğu sinif otağında şagirdlərə və müəllimlərə minalardan, partlayıcı obyektlərdən qorunmağın yollarını öyərdirlər, təhlükəsizlik tədbirləri ilə bağlı dərslər keçirlər. Sülhməramlılar bütün bunları rəsmi Moskvanın icazəsi olmadan edə bilərmi?
Rusiyadan müxtəlif səlahiyyətli şəxslərin dilindən səslənən təhlükəli və ziddiyətli fikir: “Qarabağın statusu ilə bağlı məsələ gələcəkdə müzakirə oluna bilər...”.
A.Arutyunyan son vaxtlar Rusiyaya daha çox yaxınlaşmaqdadır. Sanki Ermənistanla olan əlaqələri qismən arxa plana keçib. A.Arutyunyan bir müddət sonra Rusiyanın vassalı rolunda çıxış edəcək. Hətta rəsmi Yeravanın A.Arutyunyana təsir imkanları da azalacaq.
Səbəb nə ola bilər?
Rusiya 2022-2023-cü illərə hazırlaşır.
Birincisi, bir müddət sonra A.Arutyunyanın Ermənistan hökuməti ilə əlaqələri pisləşəcək. Ermənistanda hakimiyyətə kimin gəlməsindən asılı olmayaraq, bu məsələdə Rusiya dəst-xətti müşahidə olunacaq.
İkincisi, Xankəndidə yaşayan erməni əhalisində Rusiya “xilaskar” kimi təqdim olunacaq. Rusiyadan alınan təlimatlar əsasında bunu ictimai şüur və tələb formasına A.Arutyunyan gətirəcək.
Üçüncüsü, kiçik və süni insidentlər yaradılacaq və əhalidə Rusiyaya çağırış, imdad meylləri bərpa olunacaq.
Dördüncüsü, erməni əhalidə Ermənistan hakimiyyətinə qarşı nifrət hissi yaradılacaq və ermənilər Rusiyadam imdad istəyəcəklər
Beşincisi, Qısa müddət ərzində A.Arutyunyan Ermənistanla olan pis münasibətlərini bu dəfə daha sərt ittiham şəklində səsləndirəcək. Rusiya sülhməramlıların missiyası başqa sferaya qədəm qoyacaq. Natella Akabadan (Abxaziya) fərqli olaraq, Arutyunyan Rusiya hərbi bazalarının salınmasının vacibliyini bildirəcək.
Altıncısı, Rusiyanın “münaqişə diplomatiyası”nı işə salmağa çalışacaq, “dqr”-in “müstəqilliyi”nin tanınması ilə bağlı Nauru, Nikaraqua, Vanuatuya və Fransaya çağırışlar olunacaq.
Bütün bunları nəzərə alaraq, Rusiya qarşısında tələb qoyulmalıdır:
Bundan sonra Qarabağın gələcək statusu ilə bağlı səsləndirilən fikirlər birdəfəlik dayandırılsın. İlham Əliyev qalib ölkənin Prezidenti kimi statusun olmayacağını açıq şəkildə dəfələrlə bəyan edib. Ermənistan məğlub ölkə kimi hərbi kapitulyasiyaya imza atıb. Azərbaycanın suverenliyinə təhdid yaradan çağırışlara son qoyulmalı, Rusiyanın gələcək planları üçün sülhməramlılardan “zəmin yaradan amil” kimi istifadə olunmamalıdır.
Digər tərəfdən, Azərbaycanın 2021-ci il üçün hərbi və təhülkəsizlik xərclərinin artırılması müsbət tendensiyadır. Ordu quruculuğu daha sürətli şəkildə və həyata keçirilməli, Qarabağda monolit iqtisadi dayaqlar yaratmaq lazımdır.
Samir FEYRUZOV
