Ermənilər rus dilini "ikinci dövlət" dili kimi tanıyır: Rusiya mövqe savaşına başlayıb - TƏHLİL

Dağlıq Qarabağ separatçılarının rus dilini “ikinci dövlət” dili kimi tanıması kifayət qədər ciddi və müzakirə olunması vacib olan məsələdir.

Rus dilinin “ikinci dövlət” kimi tanınması ilə bağlı sənəddə qeyd olunur: “Rusiya sülhməramlılarının Artsaxda ( Dağlıq Qarabağda – S.F) uzunmüddətli iştirakı, çoxsaylı sosial və kommunikasiya problemlərinin birgə həll edilməsinin zəruriliyi, tikinti, səhiyyə, təhsil və elm sahələrində əməkdaşlıq rus dilinin rolunun yenidən qiymətləndirilməsini tələb edir”.

Göründüyü kimi, ermənilər qərarın qəbul edilməsini tarixi zərurət kimi qiymətləndirirlər. Diqqətçəkən çəkən məqamlardan biri qondarma rejimlə Rusiya arasındakı “təhsil və elm sahələrindəki əməkdaşlıq...” məsələsinin qeyd edilməsidir.

Sənəddə “respublika”da (“dqr”) ofis işlərinin erməni dilində, lazım gələrsə rus dilində aparılacağı, iki dildə çap olunmuş nəşrlərin, dərsliklərin, məlumat kitablarının, elmi-metodiki və elmi-kütləvi ədəbiyyatın nəşrinin təşviq ediləcəyi də qeyd olunur. Bu da təsadüf deyil.

Nəzərə almaq lazımdır ki, Türkiyənin MHP sədri Dövlət Baxçalı öz vəsaitləri hesabına Şuşada məktəb inşaası ilə bağlı təklif irəli sürdü, onun bu təklifi Azərbaycan və Türkiyə dövlət başçıları tərəfindən müsbət qarşılandı. Şuşada məktəb inşa ediləcək.

Bütün bu amilləri nəzər alaraq, şərh etmək olar:

- Rusiya mövqe savaşı aparır

- Rusiya Türkiyənin Qarabağda mövqeyinin möhkəmlənməsindən, Şuşada məktəbinin inşaası ilə bağlı məsələdən narahatdır

- Bu, Rusiyanın Dağlıq Qarabağı “mədəni işğal” layihəsinin tərkib hissələrindən biridir

- Ermənilərin başqa yolu yoxdur, özlərini Rusiyaya növbəti dəfə “sədaqətli” vassal kimi təqdim edirlər

- Rusiya Dağlıq Qarabağdakı resurslarını gücləndirir

- Gələcəkdə azərbaycanlılara qarşı baş verə biləcək təxribatlarla bağlı ermənilər bəribaşdan Rusiyanın çətiri altında sığortalanır

P.S. Gələcəkdə Dağlıq Qarabağ ətrafında baş verən bütün hadisələr təkcə Azərbaycan və Ermənistan arasında yox, həm də Rusiya və Türkiyə arasındakı hadisələr kimi qiymətləndiriləcək.

Samir FEYRUZOV