Şoyqunun inandırıcı olmayan izahatına necə cavab verək? - TƏHLİL
Politoloq Elxan Şahinoğlu: “Rusiya siyasətimizdə ciddi şəkildə korrektə etməliyik”
Rusiyanın müdafiə naziri Sergey Şoyqunun ötən həftə Azərbaycana işgüzar səfərə gəlməsi və Bakıda görüşlər keçirməsi siyasi kuluarlarda geniş müzakirələrə səbəb olan məsələlərdəndir.
Şoyqunun Bakıda verdiyi “Ermənistana Rusiyadan hərbi yüklər deyil, tikinti materialları olan yüklər göndərilib” izahatı belə görünür ki, Azərbaycanı qane etməyib. Prezidentin köməkçisi Hikmət Hacıyev də bu mövzuda şənbə günü Operativ Qərargahın brifinqində danışıb.
Bəs Azərbaycanı qane etməyən cavaba rəsmi Bakının reaksiyası necə olmalıdır? Rusiya ilə münasibətlərdə indən sonra nə dəyişəcək? Bizə hansı mövqe sərf edir?
Politoloq Elxan Şahinoğlu bildirdi ki, Sergey Şoyqu, sadəcə, Azərbaycan hakimiyyətini, Azərbaycan cəmiyyətini sakitləşdrmək məqsədilə Bakıya gələrək Kremlin mesajını bizə çatdırdı ki, guya Rusiyadan Ermənistana daşınan yüz tonlarla yük hərbi yük deyilmiş, tikinti materialları imiş. Buna heç kim inanmadı:
“Biz də inanmadıq. Mən elə ilk saatdan bunun yalan olduğunu dedim. Dövlət rəsmilərimiz də inanmadılar. Təsadüfi deyil ki, prezidentin köməkçisi Hikmət Hacıyev bu cavabın qaneedici olmadığını dedi. Önəmli bir əlavəsi də oldu ki, inşaat yükləri olsaydı başqa istiqamətdən çatdırılardı. Bu, həqiqətən də hərbi yüklər olub. Əgər prezident İlham Əliyev bu məsələ barədə Vladimir Putinə deyibsə, deməli, bu haqda səhih məlumatlara malik olub. Putinə deyilənlər də bu demək idi ki, biz sizin siyasətinizdən narazıyıq, biz artıq sizə inanmırıq. Şoyqunun açıqlaması da ona hesablanmışdı ki, rəsmi Bakı bir daha bu məsələni qaldırmasın. Amma bizim rəsmilərimiz yenə də bu məsələni qaldırır. Çünki ciddi məsələdir”.
Politoloq, ümumiyyətlə, hesab edir ki, artıq Azərbaycan hakimiyyəti Rusiya siyasətini tədricən korrektə edir:
“Belə də olmalıdır. Düzdür, iqtisadi və regional layihələrdə biz Rusiya ilə birgə işləməkdə maraqlıyıq. Hətta bu layihələrdə Rusiya bizi strateji tərəfdaş da sayır. Amma məsələ burasındadır ki, əgər Rusiya Ermənistanı gücləndirib müharibəyə şirnikləndirirsə, Azərbaycan xarici işlər naziri ilə Moskvada Rusiya xarici işlər naziri görüşdükdən cəmi bir saat sonra Lavrov Ermənistan xarici işlər nazirinə zəng edirsə, bunun özü o deməkdir ki, Qarabağ məsələsində Moskva Ermənistanın maraqlarına uyğun olmayan heç bir addım atmayacaq. Ona görə də biz də Rusiya siyasətimizdə ciddi şəkildə korrektə etməliyik. Bu o demək deyil ki, Rusiyanı düşmən elan etməliyik. İqtisadi və regional layihələri davam etdirməliyik. Amma bir daha ondan hərbi texnika almamalıyıq, siyasi məsələlərdə çox da təmaslara getməməliyik. Bizim əsas strateji müttəfiqimiz Türkiyədir. Rusiyanın Ermənistana daşıdığı hərbi yüklər əlimizə güclü alət verir ki, əgər belədirsə, biz də Türkiyə ilə hərbi ittifaqı gücləndirək, Türkiyənin hərbi bazalarını Azərbaycanda yerləşdirək”.
musavat.com
