Apteklərdə tibbi maska ajiotajı davam edir - Alıcılar isə keyfiyyətdən şikayətçidir
Prezident İlham Əliyevin imzaladığı "İnzibati Xətalar Məcəlləsində dəyişiklik edilməsi haqqında" qanununa əsasən maska taxılması tələb olunan yerlərdə qaydalara tabe olmayanlar cərimələnir. Bundan sonra paytaxtda tibbi maska ajiotajı yaşanır. Bir neçə gündür ki, apteklərin çoxunda tibbi maskaya rast gəlmək mümkün deyil.
Bundan əlavə, sosial şəbəkələrdə yerli tibbi maskaların keyfiyyətsiz, ipinin isə qısa olduğu barədə iddialar səsləndirilir. Bir neçə şəbəkə istifadəçisi tibbi maskaların ipinin tez qopduğunu, bir qismi isə tibbi maskaların balaca olduğunu bildirir.
Ötən gün isə sosial şəbəkə istifadəçisi apteklərdə satılan qara maskalardan şikayətçi olub. O, bildirib ki, aptekdə tibbi maskaya aidiyyatı olmayan qara maskalar satılır: “28 May metro stansiyasının yanındakı aptekə maska üçün daxil oldum. Mənə qara parçadan, heç bir qoruyuculuğu olmayan “maska”ları təqdim etdilər. Bu maskalar parçadandır, ipləri isə alt paltarı rezinidir. Heç bir qoruyuculuğu yoxdur”.
Bəs, tibbi ajiotajından sonra apteklərdə vəziyyət necədir? Maska qıtlığı yaşanırmı və qiymətlərdə artım varmı? Keyfiyyətsiz maskalar başqa hansı apteklərdə satılır?
Musavat.com-un əməkdaşı bütün narazılıqları və tibbi maska ajiotajını nəzərə alaraq apteklərə yollanıb. Daxil olduğumuz ilk aptekin əməkdaşı bildirdi ki, satışda, ümumiyyətlə, maska yoxdur: “Bizim aptek hipermarketin içərisində yerləşdiyi üçün buraya alıcı çox gəlir. Ona görə də maskalarımız axşamdan bitib. Gün ərzində maska gətiriləcək”.
Daha sonra Neftçilər metro stansiyanın yaxınlığındakı apteklərə baş çəkdik. Metro stansiyaya yaxın yerləşən böyük aptekdə maska qıtlığı yaşanmırdı. Satıcı bildirdi ki, maska səhər saatlarında gətirilib. Satışda yerli maskalardır, qiyməti 30 qəpikdir. Bir nəfərə 3 dənədən artıq satılmır.
Digər üç aptekdə isə nə yerli, nə də xarici istehsal olan maskaya rast gəldik. Satıcılar bildirdi ki, ötən gecədən tibbi maskalar bitib: “Yenidən sifariş vermişik, amma gün ərzində gətiriləcək, ya yox, bilmirik. Çünki həftəsonu karantin rejimi gücləndirilib və heç kim evdən çıxmayacaq. Hətta apteklər işləməyəcək”.
Qeyd edək ki, Nazirlər Kabineti yanında Operativ Qərargahın təşkil etdiyi mətbuat konfransında TƏBİB İdarə Heyətinin sədri Ramin Bayramlı bildirib ki, bu həftəsonu Bakı, Sumqayıt, Gəncə, Lənkəran şəhərləri və Abşeron rayonunda bütün marketlər və apteklər bağlı olacaq. Dərmana ehtiyacı olanları təcili yardım xidmətləri təmin edəcək.
