Media orqanı təsis etməyin yeni qaydaları müəyyənləşir

Müşfiq Ələsgərli: “Layihənin bir xüsusiyyəti də ondan ibarətdir ki, orada jurnalistin statusuna aydınlıq gətirilir...”

Azərbaycanda media orqanı təsis etməyin yeni qaydası müəyyənləşir. Belə ki, ölkədə hüquqi şəxslərin bir neçə mediası ola biləcək. Bu, “Media haqqında” Qanunun ilk versiyasında əksini tapıb. Layihəyə əsasən, bir hüquqi şəxs sayt və çap mediası təsis edə biləcək. Belə olan halda hüquqi şəxslər əlavə vergi prosedurlarını həyata keçirməkdən azad olacaq.

Bəs yeni layihənin KİV üçün hansı əhəmiyyəti olacaq?

Mövzu ilə bağlı media eksperti Müşfiq Ələsgərli “Yeni Müsavat”a danışıb. O qeyd edib ki, layihə çoxşaxəlidir: “Qeyd edim ki, qanunun əhatə dairəsi böyükdür. Yəni burada KİV-lərin bütün qolları əhatə olunur. Bildiyiniz kimi, əvvəlki qanunda onlayn medianın fəaliyyəti tənzimlənməyib. İndi isə bu qanun bütün qolları əhatə edir və bu həm ölkə, media ictimaiyyəti, həm də həmin  onlayn KİV-lərin özləri üçün vacib məsələdir, çünki onların statusları müəyyənləşir. Beləliklə də  onların strukturlarına aydınlıq gəlir ki, bunlar hansı formada struktura malikdirlər, piarlar necə olmalıdır və sairə.

Müşfiq Ələsgərli

Bildiyiniz kimi, əvvəllər bu məsələdə müəyyən sui-istifadə halları var idi. Kimlərsə yalançı KİV-ləri  yaradaraq, medianın adından neqativ faktorlar üçün istifadə edirdi. Cəmiyyət üçün də maraqlı olacaq ki, yaradılmış KİV qurumu müəyyən olunmuş standartlara uyğun gəlirsə, deməli, bu, qanunla müəyyən edilmiş KİV qurumudur, əks halda, hansısa neqativ məqsədlər üçün yaranıb və buna qarşı  öz tədbirlərini görəcəklər.

İkinci bir tərəfdən, burada qanunvericilik ciddi rol oynayır və ortada ziddiyyət aradan qaldırılır. İndiyədək Azərbaycanda informasiya alınmasını və yayılmasını tənzimləyən 10-dan çox qanunvericilik mövcud olub. Məsələn, KİV, televiziya, əlavə ictimai televiziya, məlumat azadlığı haqqında qanunlar var və sairə. Yəni eyni sahəni tənzimləyən təxminən 8 qanunvericilik mövcud idi ki, bu da həm kəmiyyət baxımından problem yaradırdı, həm də aralarında müəyyən ziddiyyətlər müşahidə olunurdu. Məsələn, məlumat azadlığı ilə KİV haqqında qanunlar arasında ziddiyyətlər, toqquşmalar olurdu. İndi bütün bunların hamısı aradan qaldırılıb və ortada vahid bir sənəd olub. Layihənin əlavə bir xüsusiyyəti isə ondan ibarətdir ki, burada jurnalistin özünün statusuna aydınlıq gətirilir. Yəni jurnalistlərlə bağlı müəyyən qaydalar müəyyənləşdirilib".