Conson yeni ittifaq yaradır - Siyahıda Türkiyə də var
Böyük Britaniyanın Baş naziri Boris Conson Rusiya Federasiyasını milli təhlükə hesab edən liberal dövlətlərdən Avropa Birliyinə qarşı ittifaq yaratmaq niyyətindədir.
Bu barədə İtaliyanın “Corriere della sera” nəşri yazıb.
Nəşrin məlumatına görə, Conson yeni siyasi, iqtisadi və hərbi ittifaqlar sistemini təklif edir. Bu ittifaq Aİ-yə alternativ olaraq Brüsselə etibar etməyən ölkələri birləşdirəcək.
Qəzet yazır ki, Conson ideyasını aprelin 9-da Kiyevdə Ukrayna Prezidenti Volodimir Zelenskiyə təqdim edib. İddialara əsasən, Britaniya bu ittifaqa Ukrayna, Polşa, Estoniya, Latviya və Litvanı, sonrakı mərhələdə Türkiyəni də daxil etmək istəyir.
Ukrayna hakimiyyəti isə öz növbəsində Londonun təşəbbüsü ilə bağlı hələlik konkret mövqe nümayiş etdirməyib, eyni zamanda Kiyev Consonun təklifinə "yox" da deməyib.
Zelenski iyunun 23-də Ukraynanın Avropa İttifaqına namizədliyinin taleyinin həll olunacağı Avropa sammitini gözləyir. Cavab mənfi olarsa, Ukrayna prezidenti Consonun alternativini ciddi qəbul edə bilər.
Bununla belə, nəşr ehtimal edir ki, Britaniyanın alyansı haqqında şayiələr Qərb siyasətçilərinə təzyiq göstərmək üçün məqsədli şəkildə yayılır.
Polşa və Baltikyanı ölkələrin yeni ittifaqa qoşulmaq istəyib-istəməyəcəyi məlum deyil.
