İran və Ermənistan prezidentləri telefonla danışdı - Nələr müzakirə olunub?

İran prezidenti İbrahim Rəisi və Ermənistan prezidenti Vahan Xaçaturyan arasında telefon söhbəti olub.

IRNA xəbər verir ki, söhbət zamanı bir sıra ikitərəfli, regional və beynəlxalq məsələlər müzakirə olunub.

İbrahim Rəisi İranın prinsipial siyasətini bütün ölkələrin ərazi bütövlüyü və suverenliyinin dəstəklənməsi olduğunu vurğulayıb:

“Beynəlxalq sərhədlər də daxil olmaqla, regionun geosiyasətinin qorunması, ölkələrin milli suverenliyinə hörmət edilməsi və regionlararası kommunikasiya infrastrukturunun gücləndirilməsi İslam Respublikasının əsas prinsipləridir".

Rəisi əlavə edib ki, regionda sülh və sabitlik ticari-iqtisadi əlaqələri və rifahı gücləndirəcək. İran prezidenti Ermənistan və Azərbaycan Respublikası arasında sülh danışıqlarında irəliləyişi dəstəklib: “Ümid edirik ki, bu sahədə qalan məsələlər beynəlxalq hüququn prinsiplərinə uyğun olaraq sülh və qarşılıqlı hörmətlə həll olunacaq".

Öz növbəsində, Vahan Xaçaturyan İslam Respublikasının prinsipial mövqeyini yüksək qiymətləndirib. O, Ermənistan və Azərbaycan arasında aparılan danışıqlar barədə məlumat verib və tezliklə Tehranda keçiriləcək "3+3" platformasında iclası dəstəkləyib.