Parlament növbədənkənar iclasda müxalifəti cəzalandıracaq - İrəvanda gərginlik
01 iyul, 2022 00:34
Müxalifətin “Müqavimət” hərəkatı iyulun 1-də səhər saatlarında parlament binasının girişində, Dəmirçyan küçəsində toplaşacaq.
Bu barədə hərəkatın üzvü Ovannes Arutyunyan Facebook-da bildirib.
“Biz səhər saat 10:30-da Dəmirçyan küçəsi tərəfdən parlamentin girişində toplaşırıq”,- o yazıb.
Xatırladaq ki, hakim “Mülki müqavilə” partiyasının parlament fraksiyası iyulun 1-də parlamentin növbədənkənar iclasının çağırılması təşəbbüsü ilə müraciət etmişdi.
Müxalifətdən olan İşxan Saqatelyanın parlamentin vitse-spikeri vəzifəsindən geri çağırılması, habelə Vahe Akopyanın parlamentin iqtisadi məsələlər üzrə daimi komissiyasının sədri səlahiyyətlərinə xitam verilməsi haqqında qərar layihələrinin gündəliyə salınması təklif edilib.
