İsraildə pulla Ukrayna əleyhinə mitinqlər təşkil edilir? - Sergey Korniyçuk
"Rusiya İsraildə Ukrayna əleyhinə mitinqlər təşkil edir".
Bunu Ukraynanın İsraildəki səfiri Sergey Korniyçuk iyulun 15-də "Espreso" telekanalının efirində söyləyib.
"İsraildə son vaxtlar anti-Ukrayna mitinqləri ilə bağlı pis tendensiya yaranıb. Çünki biz rus pulu ilə "vatnik"lərin(keçmişdə yoxsul rusların geyindiyi pambıq gödəkçə- Rusiya rejimini dəstəkləyənlərə verilmiş ironik ad - S.L.) keçirdiyi tədbirləri görürük. Onlar müəyyən bələdiyyə ərazilərində belə aksiyalar keçirirlər", - deyə diplomat bildirib.
O qeyd edib ki, bu cür mitinqlər xüsusilə Netanya və Hayfada təşkil olunub.
Təl-Əvivdəki səfirliyimizin yanında iki dəfə anti-Ukrayna aksiyası keçirildi. O adamlara yaxınlaşıb bunun üçün nə qədər pul aldıqlarını soruşdum. Təəssüf ki, belə mitinqləri qadağan etmək olmaz”, - deyə Korniyçuk vurğulayıb.
Onun sözlərinə görə, bununla belə, “İsraildə Ukraynaya dəstək ancaq artır”.
"İsrailli ukraynalıları dəstəkləyirsə, onun hansı dildə danışmasının heç bir fərqi yoxdur. Biz izah edirik ki, rusdilli yəhudilərin əksəriyyəti totalitar rejimdən qaçaraq Rusiyanı tərk edib. Ona görə də adam Rusiyadan gəlibsə, bu o demək deyil ki, o, Ukraynaya qarşı müharibəni dəstəkləyir”, - deyə Korniyçuk izah edib.
