Şimali Koreya "DXR" və "LXR" respublikalarına fəhlələr göndərir? -  "Guardian" nəşri

Rusiyanın Pxenyandakı səfirinin sözlərinə görə, Şimali Koreya Moskvanın nəzarətində olan saxta "DXR" və "LXR" respublikalarına fəhlələr göndərə bilər. Bu, KXDR-in nüvə proqramına qarşı beynəlxalq sanksiyalara meydan oxumaq demək olacaq.

Bu barədə Böyük Britaniyanın "Guardian" qəzeti yazıb.

Rusiyanın KXDR-dəki səfiri Aleksandr Matseqora bəyan edib ki, Şimali Koreya fəhlələri Donetskdə və Luqanskda  tanınmayan "xalq respublikaları"nda "müharibə nəticəsində dağıdılan infrastrukturunun bərpasına" kömək edə bilər.

Matseqora qeyd edib ki, KXDR və Donbasdakı tanınmayan respublikalar arasında iqtisadi əməkdaşlıq üçün , BMT-nin sanksiyalarına rəğmən, potensial imkanlar çoxdur.

Nəşrin verdiyi məlumata görə, Rusiyanın "İzvestiya"  qəzetinə müsahibəsində diplomat qeyd edib ki, "ən ağır şəraitlərdə işləmək qabiliyyəti olan yüksək ixtisaslı və əməksevər koreyalı inşaatçılar" sosial, infrastruktur və sənaye obyektlərinin bərpasına kömək edə bilər.

Onun şərhləri Şimali Koreyanın iki saxta "DXR" və "LXR" dövlətlərini tanıyandan bir neçə gün sonra üzə çıxıb. Şimali Koreya Ukrayna hökumətini Vaşinqtonun Pxenyana qarşı "düşmən" mövqeyində əli olduğunda ittiham edib.

Bundan dərhal sonra Ukrayna "dost olmayan hərəkətinə cavab olaraq" Şimali Koreya ilə diplomatik münasibətlərə xitam verib.

"Guardian" nəşrinin qeyd etdiyi kimi, Şimali Koreya ənənəvi olaraq öz vətəndaşlarını xaricə göndərərək, valyuta qazanıb. Lakin BMT-nin sanksiyalarına uyğun olaraq, Şimali Koreya qastarbayterləri 2019-cu ilin sonunadək vətənə dönməyə borclu olub. 

Buna baxmayaraq, KXDR-in xeyli sayda fəhlələri Rusiya, Çin, Laos və Vyetnamda müəyyən edilən müddətdən sonra da qalıb pul qazanıblar.

Siyasi tədqiqatlar İnstitutunun elmi əməkdaşı Qo Men Hen bununla bağlı bəyan edib ki, Rusiya BMT Təhlükəsizlik Şurasının daimi üzvü kimi KXDR əleyhinə sanksiyaların qəbulunda iştirak edib, indi isə özünün Şimali Koreya fəhlələrinin "LDXR"-ə dəvət etməsi qərarı ilə izqoy ölkəyə çevrilməyə risk edir.

"Rusiya elə özünün tətbiq etdiyi sanksiyaları pozarsa, BMT Təhlükəsizlik Şurası tərəfindən bu ölkəyə etimad xeyli dərəcədə sarsılacaqdır", - Qo Men Hen vurğulayıb.