ABŞ-Çin münasibətlərində yeni gərginlik - "Bloomberg"
ABŞ Prezidenti Co Bayden və Çin Prezidenti Si Çinpin cümə axşamı danışacaqlar.
"Bloomberg" xəbər verir ki, iki liderin dörd aylıq fasilədən sonra ilk söhbəti Tayvanla bağlı yaranan yeni gərginlik fonunda baş tutacaq.
Bayden və Çinpin arasında planlaşdırılan danışıqlar sayca beşincidir. İki həftədir ki, bu danışıqlara hazırlıq gedir.
Lakin Nümayəndələr Palatasının spikeri Nensi Pelosinin Tayvana səfər etmə ehtimalı ABŞ-la Çinin mürəkkəb münasibətlərinə yeni gərginlik əlavə edib.
Çin hökuməti bundan əvvəl Nensi Pelosi Tayvana səfər edəcəyi təqdirdə "həlledici addımlar" atacağı barədə xəbərdarlıq etmişdi.
Demokratlar Partiyası liderinin Tayvana səfəri aprel ayında COVID-19 testinin nəticəsi müsbət çıxdığı üçün təxirə salındı. Çin o zaman da belə bir səfərin ABŞ-la münasibətlərə ciddi təsir edəcəyini bildirmişdi.
Çin Xarici İşlər Nazirliyinin sözçüsü Çjao Litszyan deyib ki, Pelosinin səfəri “Çinin suverenliyi və ərazi bütövlüyünə ciddi zərbə vuracaq”.
